Maður skyldi halda að bangsinn glað- og gæflyndi, Bangsímon – eða Winnie-the-Pooh eins og hann heitir á frummálinu geti varla verið ógn við neinn, hvað þá voldugt ríki eins og Kína. En Kínverjar hafa samt ákveðið að banna Bangsímon. Bannið nær til nýrrar kvikmyndar sem fjallar um Bangsímon og vin hans Jakob – myndin er gerð af Disney og hefur fengið alveg ágæta dóma. En undir það falla líka myndir af Bangsímoni á samskiptamiðlum.
Ástæðan er ekki stjórnmálalegs eða siðferðislegs eðlis, heldur snýst þetta einungis um hégóma Xi Jinping, forseta Kína. Menn hafa nefnilega talið sig sjá ákveðin líkindi með honum og Bangsímoni og það fer í taugarnar á kínverska leiðtoganum.
Sumir aðrir myndu kannski vera upp með sér af því að líkjast svo ágætum bangsa – en það á ekki við um hinn valdamikla Xi.
Meðal annars var bent á líkindin þegar Xi hitti Obama Bandaríkjaforseta. Og aftur þegar hann hitti Abe, forsætisráðherra Japans. En Xi finnst þetta semsagt hvorki sniðugt né skemmtilegt. Og því sætir Bangsímon blessaður ritskoðun í Kína.