Snæbjörn Brynjarsson, rithöfundur og Pírati, vekur athygli á Facebook-síðu sinni á því að í kosningaprófi RÚV vegna sveitastjórnarkosninga hafi Eyþór Arnalds sagst vera 100 prósent andvígur uppbyggingu félagslegs húsnæðis.

Líkt og hefur komið fram hefur minnihlutinn í borgarstjórn fundað um neyðarástand í málefnum heimilislausra í borginni. Í tilkynningu frá fulltrúum Sjálfstæðisflokks, Miðflokks, Sósíalista og Flokks fólksins, var sagt að þau harmi það sem þau kalla algjört aðgerðarleysi í málefnum heimilislausra af hálfu meirihlutans.

Snæbjörn telur að aðkoma Eyþórs að þessu sé hræsni. „Eyþór Arnalds lýsti sig fullkomlega andvígan frekari uppbyggingu félagslegra íbúða í kosningaprófi RÚV í vor. 100% andvígan meira að segja. Þess vegna hef ég enga trú á að hann beri hag heimilislausra sér fyrir brjósti. Er meira að segja 100% sannfærður um að honum sé skítsama,“ skrifar Snæbjörn á Facebook.