Vilhjálmur Birgisson, formaður Verkalýðsfélags Akraness, segir engan vilja hjá Bjarna Benediktssyni, fjármálaráðherra, um að gera kerfisbreytingar í ætt við þær sem forkólfar verkalýðshreyfingarinnar hafa kallað eftir og Eyjan hefur greint frá.
Bjarni undraðist tal verkalýðshreyfingarinnar í Morgunblaðinu, líkt og Eyjan greindi frá í morgun, sagði kröfur hennar undarlegar og með ólíkindum. Þá sagði hann svigrúm til launahækkana lítið sem ekkert.
Vilhjálmur segir höfnun Bjarna á hugmyndum verkalýðshreyfingarinnar grátbroslega, þar sem vikið er að þeim í stjórnarsáttmálanum:
„Það lítur út fyrir að fjármálaráðherra hafni öllum þessum hugmyndum okkar um kerfisbreytingar í þágu almennings og það er algjörlega grátbroslegt að fjármálaráðherra skuli hafna sumum af þessum hugmyndum í ljósi þess að um þessi atriði er getið í stjórnarsáttmálanum.
En í þessari frétt segir Bjarni Benediktsson, fjármálaráðherra að hann gefi lítið fyrir fullyrðingar verkalýðsleiðtoganna um róttækar aðgerðir, eins og afnám verðtryggingar, lækkun vaxta og að taka húsnæðisliðinn úr vísitölunni ef flest þessi atriði eru í stjórnarsáttmálanum!“
Segir hann Bjarna einráðan í ríkisstjórninni:
„Það er morgunljóst að það stefnir í gríðarleg átök á vinnumarkaði enda virðist ekki neinn vilja vera að finna hjá fjármálaráðherra um að vinna að kerfisbreytingum þar sem hagsmunir almennings verði teknir framyfir hagsmuni fjármálakerfisins. Það virðist vera eins og fjármálaráðherra sé sem nánast einn í þessari ríkisstjórn, allavega ræður hann öllu sem hann vill ráða!“
„Eins og ég hef áður sagt þá telja formenn Verkalýðsfélags Akraness, Eflingar, VR og Framsýnar að það þurfi að koma til róttækar kerfisbreytingar af hálfu stjórnvalda samhliða komandi kjarasamningum. Kerfisbreytingar þar sem hagsmunir almennings og lágtekjufólks verði hafðir að leiðarljósi en ekki hagsmunir auðvaldsins og fjármálafyrirtækja.
Þessar kerfisbreytingar sem við höfum verið að kalla eftir lúta að afnámi verðtryggingar, lækkun vaxta, að húsnæðisliðurinn fari úr lögum um vexti og verðtryggingu. Einnig að skattbyrgði milli -og lágtekjufólks verði lækkaðir með hækkun persónuafsláttar og einnig þarf að koma böndum á þá græðgisvæðingu sem er að eiga sér stað á leigumarkaðnum. Það liggur einnig fyrir að lagfæra þarf skerðingarhlutfall barnabóta sem hafa dregist gríðarlega saman á liðnum árum sökum þessa.“