Líkt og fjallað hefur verið um, var Davíð Snæ Jónssyni vikið úr stjórn Sambands íslenskra framhaldsskólanema, hvar hann gegndi formennsku, af framkvæmdarstjórn félagsins, fyrir greinarskrif sín um kynjafræði. Hafði stjórn sambandsins áður bannað Davíð að birta greinina, þar sem hún gengi gegn stefnu félagsins um kynjafræði.

Davíð varð spurn í grein sinni, hvort ekki ætti að gera Marxísk fræði að skyldufagi í skólum, fyrst pólitísk hugmyndafræði væri kennd þar á annað borð, í formi kynjafræði, sem hann segir pólitíska innrætingu.

Sjá frétt: Davíð Snær rekinn sem formaður vegna skrifa um kynjafræðslu

Sjá frétt: Davíð Snær tekur til varna: „Skoðanafrelsi einstaklinga er brennt á teini“

Árás á tjáningarfrelsið

Hannes Hólmsteinn Gissurarson, prófessor í stjórnmálafræði, styður sinn mann Davíð í málinu, en Davíð segist á Facebooksíðu sinni styðja Sjálfstæðisflokkinn.

Hannes segir brottvikningu Davíð vera árás á tjáningarfrelsið:

„Ótrúleg árás á tjáningarfrelsi. Ekki byrjar það vel hjá þessu unga fólki.“

Þá hefur Einar Freyr Bergsson, gjaldkeri Sambands íslenskra framhaldsskólanema, sagt á samfélagsmiðlum að upplýsingum hafi verið haldið frá honum þegar ákvörðunin um brottvikninguna var tekin:

„Hér gleymist að taka fram að upplýsingum var haldið frá mér, sitjandi gjaldkera félagsins. Ákvörðun þessi var tekin löngu áður en ég fékk eitthvað með hana að segja.“