Þórunn Egilsdóttir, þingflokksformaður Framsóknarflokksins, er jarðeigandi á Hauksstöðum í Vopnafirði. Hún deilir því jörð með ríkasta manni Bretlands, James Ratcliffe, en hann hefur keypt fjölda jarða í Vopnafirði og meirihlutann í Grímsstöðum á Fjöllum, ásamt Jökulsá á Fjöllum. Hafa margir lýst áhyggjum af þeirri þróun, til dæmis Sigurður Ingi Jóhannsson, formaður Framsóknarflokksins.
Eiríkur Jónsson greinir frá því á vef sínum að Ratcliffe hafi keypt jörð af mági Þórunnar, sem nú er látinn og eigi Ratcliffe því nú 20% af jörðinni á móti Þórunni og eiginmanni hennar.
Þetta staðfesti Þórunn við Eyjuna:
„Mágur minn átti 41,67 af jörðinni eins og við hjónin. Fyrir mörgum árum seldi hann hluta til einhvers félags, sem ég veit ekki hver er á bak við. En við eigum sjálfstætt okkar hluta af jörðinni,“
sagði Þórunn, en hún segist engin samskipti eiga við Ratcliffe, hafi aðeins séð honum bregða fyrir í bíl.
Þórunn var í viðtali á Morgunvakt Rásar 1 í morgun, þar sem hún sagði að nýting jarða væri mikilvægari en eignarhaldið:
„Við þurfum að leita allra leiða til að nýta jarðirnar og okkur vantar stefnu. Við þurfum að ákveða hvernig við ætlum að nýta jarðirnar til landbúnaðarframleiðslu og matvælaframleiðslu. Og það á að gilda jafnt um Íslendinga sem útlendinga sem kaupa jarðirnar, hvernig þær eru nýttar, og við þurfum að hafa skýra stefnu og sýn í því og það fer hver að verða síðastur um það.“
Aðspurð hvort þjóðerni jarðeigenda skipti hana máli, sagði Þórunn við Eyjuna:
„Nýtingin skiptir öllu máli. Og ef við gerum það á þann hátt sem við erum sátt við, þá finnst mér það ekki vera stærsta málið. En auðvitað vildi ég sjá íslenskar fjölskyldur búa hér á hverjum bæ.“