Staksteinar Morgunblaðsins gera í dag harða atlögu að Helgu Völu Helgadóttur, þingkonu Samfylkingarinnar, fyrir framgöngu hennar í tengslum við Hátíðarfund Alþingis og heimsókn forseta danska þingsins Piu Kjærsgaard. Helga Vala mætti á hátíðarfundinn en gekk frá fundarstaðnum er Pia Kjærsgaard hóf að halda ræðu sínu. Einnig vakti athygli að Helga Vala mætti í veislu sem haldin var af þessu tilefni um kvöldið en brá sér frá veislustaðnum á meðan Pia Kjærsgaard hélt þar ræðu. Staksteinar Morgunblaðsins hafa þessi orð um málið:
Í sérkennilegri atburðarás í tengslum við hátíðarfund Alþingis á Þingvöllum og vægast sagt óviðeigandi framkomu nokkurra þingmanna hefur hlutur Helgu Völu Helgadóttur komið einna mest á óvart. Ólíkt þingmönnum Pírata mætti Helga Vala á þingfundinn, en rauk á brott þegar forseti danska þingsins hóf mál sitt.
Hún fékkst ekki til að sitja þingfund þrátt fyrir að hafa ríka skyldu til þess. Um kvöldið var svo haldin veisla. Helgu Völu bar engin skylda til að vera þar. Þar hefði hún getað komið mótmælum á framfæri með fjarveru, líkt og stundum hefur verið gert. Það hefði ekki endilega verið viðeigandi, en þó skárra en sú leið sem þingmaðurinn fór.
En Helga Vala mætti í veisluna. Þar sat hún og braut brauð með danska þingforsetanum, naut matar og drykkjar í þeim félagsskap. Þetta réttlætti hún með því að bregða sér afsíðis augnablik á meðan gesturinn hélt stutta tölu. Svo hélt hún áfram að njóta matar og drykkjar í sama félagsskap.
Einhverjir halda því fram að matseðillinn hafi verið svo ómótstæðilegur að þingmaðurinn hafi ekki fengið sig til að afþakka boðið.
Aðrir telja líklegra að uppákoman á Þingvöllum hafi verið gerð fyrir fjölmiðlaathygli og liður í undirbúningi að formannsframboði í flokknum.
Óljóst er hvor skýringin er verri.