Stjórn Landssambands veiðifélaga lýsir furðu sinni yfir hugmyndum Hafrannssóknarstofnunar um að hefja stórfellt sjókvíaeldi á frjóum norskum laxi í Ísafjarðardjúpi, samkvæmt tilkynningu frá félaginu. Áform stofnunarinnar sem fram kom í fréttatilkynningu um 3000 þúsund tonna laxeldi eiga eru sagðar eiga „ekkert skylt við tilraunir“ heldur séu „aðeins til þess fallnar að stíga óheillaskref í þá átt að opna Ísafjarðardjúp fyrir þauleldi á frjóum norskum laxi.“
Landssambandið telur að þauleldi Hafrannsóknarstofnunar og mögulegra samstarfsaðila á laxi í sjó af þeirri stærðargráðu sem tilkynnt hefur verið falli ótvírætt undir ákvæði laga um mat á umhverfisáhrifum og skuli því sæta umhverfismati líkt og aðrar ámóta framkvæmdir. Landssambandið bendir á að Skipulagsstofnun hafi þegar gefið út álit um laxeldi í Ísafjarðardjúpi og fram hjá niðurstöðu stofnunarinnar verður ekki litið þótt hér sé leitast við að bregða sauðagæru yfir úlfinn þegar enn og aftur er ráðist með sjókvíaeldi gegn íslenskri náttúru.
„Á öllu þessu máli eru fingraför stjórnmálanna og trúverðugleiki Hafrannsóknarstofnunarinn sem sjálfstæðrar vísindastofnunar því í húfi. Stofnkostnaður við þessa svokölluðu tilraun í Ísafjarðardjúpi mun hlaupa á milljörðum króna og allar upplýsingar um áhrif eldis á náttúruna sem þarna skal afla liggja nú þegar fyrir. Nær væri að fylgjast með áhrifum sjókvíeldisins á suðurfjörðum Vestfjarða. Landssamband veiðifélaga mun beita öllum tiltækum ráðum til að stöðva þennan ógeðfellda blekkingarleik stjórnvalda og fiskeldismanna.“