Ásmundur Friðriksson, þingmaður Sjálfstæðisflokksins, setti inn færslu á Facebook í dag sem vakti nokkra athygli. Birti hann mynd af forsíðu Fréttablaðsins, sem skartaði mynd af óléttri konu halda á mótmælaskilti, með orðunum „Helvítis fokking fæðingar“.
Af því tilefni skrifaði Ásmundur að „Ljótleiki kjarabaráttunnar“ ætti sér „engin takmörk“. Fékk Ásmundur bágt fyrir þetta í athugasemdarkerfinu, þar sem ljósmæður njóta mikilllar samstöðu og velvilja almennings í kjarabaráttu þeirra við ríkið.
Ingimar Karl Helgason, samskiptastjóri Öryrkjabandalagsins hæddist að færslu Ásmundar og skrifaði:
„Ljótleiki sjálftökunnar á sér engin takmörk.“
Þá skrifaði Björn Leví Gunnarsson, þingmaður Pírata:
„Þú sem talar fyrir bættum kjörum eldri borgara en greiðir atkvæði gegn þeim. Takk fyrir að vera þú og sýna svo skýrt og greinilega hvað er að í íslenskum stjórnmálum. Vona að þér vegni vel í framtíðinni, bara á einhverjum öðrum vettvangi. /passive agressive“.
Ásmundur tók færsluna út en í samtali við Eyjuna sagði hann það vegna ljótra athugasemda. Tilefni færslunnar sagði hann vera þá að honum hafi blöskrað orðalagið á skiltinu í Fréttablaðinu:
„Mér fannst þetta óviðeigandi mynd í Fréttablaðinu. Textinn þarna var fyrir neðan allar hellur og móðgandi við konur.“
Aðspurður hvort hann styddi kjarabaraáttu ljósnmæðra sagði Ásmundur:
„Ég bara legg mikla áherslu á að þessu máli ljúki sem fyrst. Ég er ekki að gagnrýna þessa deilu eða neitt slíkt, ég er bara að gagnrýna þetta orðalag. Það hafa komið til mín konur sem geta ekki átt börn og voru slegnar yfir þessu.“