Fjármála- og efnahagsráðuneytið hefur birt ýmsar tölulegar upplýsingar um laun ljósmæðra á vef sínum. Er tilefnið sagt fjölmiðlaumfjöllun undanfarinna daga og því vilji ráðuneytið „vekja athygli“ á birtum upplýsingum.
Af lestri gagnanna mætti ætla að ráðuneytið væri að reyna hafa áhrif á almenningsálitið í kjaradeilunni við ljósmæður.
Meðal þeirra upplýsinga sem ráðuneytið telur mikilvægt að komi fram, er að meðalheildarlaun ljósmæðra fyrir fullt starf árið 2017 hafi verið 848 þúsund krónur á mánuði og að meðaldagvinnulaun hafi verið 573 þúsund krónur á mánuði.
Þá er tekið fram að stöðugildum ljósmæðra hafi fjölgað um 33% milli 2007 og 2017, meðan fæðingum hafi fækkað um 8%.
Þá er tilgreint að ljósmæður hafi fengið 16% hækkun umfram önnur félög BHM árið 2008 og hafi frá þeim tíma fengið sömu hækkanir og önnur BHM-félög.
1. Á árinu 2017 störfuðu að meðaltali 252 ljósmæður hjá ríkinu í 172 stöðugildum.
2. Meðalstarfshlutfall ljósmæðra hjá ríki árið 2017 var 69%. Um 14% ljósmæðra eru í fullu starfi.
3. Á tímabilinu 2007 til 2017 hefur stöðugildum ljósmæðra hjá ríkinu fjölgað um 33% en fæðingum fækkað um rúm 8%. Á mynd 1 má sjá þróun fjölda stöðugilda ljósmæðra og fjölda fæðinga á árunum 2007-2017.
4. Árið 2008 fengu ljósmæður 16% hækkun umfram önnur BHM-félög sem leiðréttingu vegna viðurkenningar á aukinni menntun. Frá þeim tíma hafa ljósmæður fengið sömu hækkanir og önnur BHM-félög.
5. Meðaldagvinnulaun ljósmæðra miðað við fullt starf árið 2017 voru 573 þús. kr. Á mynd 2 má sjá þróun vísitölu dagvinnulauna ljósmæðra í samanburði við launavísitölu og samanburðarstéttir.
6. Meðalheildarlaun ljósmæðra fyrir fullt starf árið 2017 voru 848 þús. kr. á mánuði. Á mynd 3 má sjá þróun heildarlauna ljósmæðra samanborið við samanburðarstéttir og í töflu 1 má sjá samanburð á meðaldagvinnu- og heildarlaunum BHM-félaga 2017.
Tafla 1. Samanburður á meðallaunum BHM-félaga 2017
Meðallaun BHM fyrir árið 2017 | Dagvinnulaun | Heildarlaun |
BHM | 607.515 | 717.969 |
Félag prófessora við ríkisháskóla | 845.350 | 929.014 |
Ljósmæðrafélag Íslands | 573.019 | 848.224 |
Kjarafélag viðskipta- og hagfræðinga | 665.881 | 834.880 |
Félag geislafræðinga | 534.808 | 804.985 |
Dýralæknafélag Íslands | 644.882 | 804.575 |
Félag lífeindafræðinga | 529.648 | 790.451 |
Stéttarfélag lögfræðinga | 650.892 | 785.413 |
Félag háskólamenntaðra starfsmanna stjórnarráðsins. | 659.241 | 777.805 |
Félag háskólakennara á Akureyri | 615.105 | 727.320 |
Félag íslenskra félagsvísindamanna | 624.557 | 723.082 |
Fræðagarður | 577.722 | 670.295 |
Sálfræðingafélag Íslands | 590.715 | 660.586 |
Félag íslenskra náttúrufræðinga | 558.198 | 639.280 |
Stéttarfélag bókasafns- og upplýsingafræðinga | 570.432 | 626.051 |
Félag háskólakennara | 556.055 | 621.256 |
Stéttarfélag íslenskra félagsráðgjafa | 560.413 | 618.087 |
Stéttarfélag sjúkraþjálfara | 514.259 | 587.396 |
Leikarafélag Íslands | 502.364 | 570.631 |
Þroskaþjálfafélag Íslands | 479.912 | 570.323 |
Iðjuþjálfafélag Íslands | 508.040 | 543.069 |
Samninganefnd ríkisins hefur sem fyrr fullt umboð frá fjármálaráðherra og ríkisstjórn í samningaviðræðum við ljósmæður. Það er einlægur vilji stjórnvalda að ljúka deilunni eins fljótt og kostur er.