Sanna Madgalena Mörtudóttir, oddviti Sósíalista í minnihluta borgarstjórnar, tekur til máls á Facebook síðu sinni í dag. Þar tjáir hún sig um minnihlutasamstarfið við Sjálfstæðisflokkinn, sem hefur verið gagnrýnt af mörgum. Sanna greiddi fulltrúum Sjálfstæðisflokksins atkvæði í ráð og nefndir borgarinnar. Féll það í misgóðan jarðveg stuðningsmanna Sósíalista og sagðist Daníel Örn Arnarson, varaborgarfulltrúi Sósíalista, vera hugsi yfir þeirri ákvörðun. Hann sagði að Sjálfstæðisflokkurinn væri ennþá óvinurinn, en þau væru valdalausi óvinurinn. Hann sagði kosninguna vera formsatriði.

Sanna segir í dag að óánægjan hefði komið sér á óvart:

„Eftir borgarstjórnarfund á þriðjudaginn var nokkuð um það rætt á samfélagsmiðlum að sósíalistar hefðu boðið fram í nefndir með öðrum flokkum í minnihlutanum. Þetta kom mér á óvart þar sem það er fátítt að flokkar í minnihluta bjóði ekki fram saman við nefndarkjör til að tryggja réttláta skiptingu nefndarsæta milli flokka. Að baki slíku samkomulagi liggur aldrei neitt málefnasamkomulag enda gera minnihlutar ekki með sér málefnasamning. Þetta fyrirkomulag hefur bæði verið haft um nefndarkjör á þing og í sveitastjórnum áratugum saman og því kom mér á óvart að eitthvað athugavert þætti við að sósíalistar í borgarstjórn væru í samfloti með öðrum flokkum í minnihlutanum varðandi nefndarkjör.“

Hún bendir á að ef ekki hefði verið farin þessi leið, hefðu Sjálfstæðismenn fengið öll lausu plássin í sjö manna ráðunum þar sem meirihlutinn fengi fjóra menn:

„Ef minnihlutaflokkarnir hefðu ekki boðið fram saman hefði meirihlutinn fengið fjóra menn í öllum sjö manna ráðum og Sjálfstæðisflokkurinn alla hina þrjá. Sósíalistar, Miðflokkur og Flokkur fólksins hefðu ekki fengið neinn mann kjörin. Það lá hins vegar ljóst fyrir að ef Sósíalistar, Miðflokkur og Flokkur fólksins biðu fram saman myndu þeir ná einum manni af Sjálfstæðisflokknum í hverju ráði. Flokkarnir gerðu því fljótlega eftir kosningar samkomulag um þetta. Þegar það lá fyrir óskaði Sjálfstæðisflokkurinn eftir því að vera með og bauð m.a. Flokki fólksins að skipta á einni nefnd og sáu sósíalistar ekki ástæðu til að setja sig upp á móti því. Sjálfstæðisflokkurinn fékk ekkert út úr þessu samkomulagi umfram það sem hann hefði fengið með því að bjóða fram einn, heldur minna.“

Sanna vísar því á bug að með þessu hafi hún verið að auka veg Sjálfstæðismanna:

„Það er því í meira lagi rangt að stilla því svo fram að sósíalistar hafi verið að auka veg Sjálfstæðismanna í borgarstjórn með því að bjóða fram með öðrum minnihlutaflokkum. Þvert á móti leiddi samkomulag sósíalista við Miðflokk og Flokk fólksins til þess að Sjálfstæðisflokkurinn fékk minna.“

Þá segir Sanna að hugmyndir hennar um að breyta fyrirkomulaginu hafi ekki hlotið framgöngu hjá meirihlutanum:

„Samkomulag sósíalista, Miðflokks og Flokks fólksins gat hvorki náð til borgarráðs né skipulags- og samgönguráðs því það var túlkun borgarstjórnar að þegar einn af þeim lista yrði kjörinn væru hinir flokkarnir að afsala sér áheyrnarfulltrúa í þessum ráðum. Sósíalistar hafa reynt að fá þessari túlkun breytt, en meirihlutaflokkarnir hafa ekki kippt þessu í fyrra horf. Það er því vegna afstöðu meirihlutans sem það sitja þrír fulltrúar frá Sjálfstæðisflokknum í borgarráði og skipulags- og samgönguráði en enginn fulltrúi frá sósíalistum, Miðflokki eða Flokki fólksins.“