Fulltrúaráð Sjálfstæðisflokksins í Vestmannaeyjum vék Páli Magnússyni, oddvita Sjálfstæðisflokksins í Suðurkjördæmi, úr ráðinu á aukaaðalfundi í gærkvöldi. Ennfremur lýsti það yfir fullu vantrausti á þingmanninn með lófaklappi, vegna framgöngu hans í aðdraganda sveitastjórnarkosninga, en þar studdi Páll ekki framboð Sjálfstæðisflokksins. Þetta kemur fram á mbl.is.

„Við kjós­um í full­trúaráðið en hann var ekki á þeim lista sem var nú bor­inn upp til at­kvæða. Það samþykktu all­ir fund­ar­menn að hafa hann ekki á list­an­um. Ég held að þetta sé í fyrsta skipti í sög­unni sem þingmaður úr heima­bæn­um er ekki í full­trúaráði, enda er þetta ef­laust í eina skipti í sögu stjórn­mála sem odd­viti flokks­ins styður ekki sinn flokk í sveit­ar­fé­lag­inu,“

seg­ir Jarl Sigurgeirsson, formaður fulltrúaráðsins við Morgunblaðið.

„Full­trúaráðið get­ur ekki litið á þing­mann­inn sem trúnaðarmann Sjálf­stæðis­flokks­ins og ósk­ar eft­ir fundi með for­ystu flokks­ins vegna þeirr­ar al­var­legu stöðu sem upp er kom­in,“

segir í ályktun fulltrúaráðsins.

Bjarni Benediktsson, formaður Sjálfstæðisflokksins, sagði við Fréttablaðið að hann myndi ræða málið við sitt fólk, en vildi lítið tjá sig annars um málið.

Páll studdi framboð klofningslistans Fyrir Heimaey sem leitt var af Írisi Róbertsdóttur og myndaði nýjan meirihluta með Eyjalistanum.

Staða Páls innan Sjálfstæðisflokksins er talin afar veik. Ljóst er að líkurnar á að hann fái endurnýjað umboð sem þingmaður í næstu alþingiskosningum hafa minnkað verulega.

Eftir stendur að staða ökuþórsins Ásmundar Friðrikssonar, sem er annar þingmaður Suðurkjördæmis fyrir Sjálfstæðisflokkinn, hefur styrkst til muna, þegar til lengri tíma er litið. Hann er vinsæll í kjördæminu og þekkir vel til í Eyjum eftir tíma sinn þar. Hann hlaut góða kosningu og stendur í raun eftir með pálmann í hendinni og bíllyklana í hinni.

Vilhjálmur Árnason, þriðji þingmaður kjördæmisins fyrir Sjálfstæðisflokkinn, ætti einnig að færast upp um sæti, haldi hann rétt á spilum sínum. Hann er hinsvegar ekki mjög áberandi í þingstörfum og gæti fengið harða samkeppni frá Elliða Vignissyni, ákveði bæjarstjórinn fyrrverandi að fara í landsmálin.