Nýtt meirihlutasamstarf Samfylkingar, Viðreisnar, Pírata og Vinstri grænna í Reykjavík og málefnasamningur flokkanna  fer misjafnlega í oddvita minnihlutans í borgarstjórn. Í gær sagði Eyþór Arnalds við Eyjuna að hann teldi borgarbúa svikna, þar sem nýi meirihlutinn væri í raun ekki nýr, heldur gamall og sama gilti um borgarstjórann. Þetta væru vonbrigði fyrir borgarbúa, því þetta endurspeglaði ekki niðurstöður kosninga; fólk hefði kosið breytingar, en ekki fengið.

Vigdís Hauksdóttir, oddviti Miðflokksins, sagði viðbrögð sín við nýjum meirihluta vera „málum blandin“ í samtali við Morgunblaðið:

„Ég er undrandi yfir því aðgerðaleysi sem birtist í stefnuplagginu. Nýr meirihluti horfir á borgarlínuna sem alfa og ómega alls í Reykjavík í stað þess að taka á þeim bráðavanda sem blasir við borgarbúum, húsnæðisskorti, leikskólamálum og fleiru.“

Þá tók Vigdís undir orð Eyþórs Arnalds og sagði að borgarbúar myndu ekki finna fyrir því að nýr meirihluti væri tekinn við:

„Eins og þetta birtist mér er verið að keyra áfram sömu stefnu og hefur verið gert í Reykjavíkurborg undanfarin átta ár. Það er haldið áfram að tala um að skoða hlutina, keyra tilraunaverkefni og setja mál í nefndir svo að borgarbúar munu ekki finna fyrir neinum breytingum þrátt fyrir að kallað hafi verið eftir þeim í kosningunum.“

Kolbrún Baldursdóttir, oddviti Flokks fólksins, segir sáttmálann vera mjög almennt orðaðan, hún hefði viljað sjá aðra forgangsröðun:

„Ég hefði viljað sjá að fólk væri sett í aðalforgang, mér finnst borgarlínan alltaf vera sett í fyrsta sæti. Sáttmálinn er mjög almennt orðaður og hvergi að sjá hvernig á að gera hlutina.“

Hún vildi þó ekki vera of neikvæð og sagðist styðja öll góð málefni:

 „Við munum styðja öll góð og heilbrigð málefni og leggja mikla áherslu á að bæta þjónustu fyrir barnafjölskyldur. Við höfum miklar áhyggjur af ört vaxandi biðlistum eftir þjónustu og ég innti borgarstjóra við undirritun meirihlutasáttmálans eftir viðbrögðum við biðlistum í heimaþjónustu en fékk lítil svör frá honum.“

Sósíalistar taka sterkast til orða og segja að sáttmálinn sé stríðsyfirlýsing gegn fátækum. Í yfirlýsingu sögðu þeir að sáttmálinn væri „fráleit niðurstaða“ og að brauðmolarnir sem féllu til hinna verr settu væru of „fáir og smáir.“