Píratar lögðu fram þingsályktunartillögu um borgaralaun á Alþingi í dag. Borgaralaun eiga að tryggja öllum borgurum landsins skilyrðislausa grunnframfærslu með því augnamiði að styrkja efnahagsleg og félagsleg réttindi fólks og stuðla að jöfnum tækifæri. Vilja Píratar að skipaður verði starfshópur sem leiti leiða til að koma hugmyndinni í verk.

Ekki eru allir jafnhrifnir af hugmyndinni um borgaralaun. Brynjar Níelsson, þingmaður Sjálfstæðisflokksins hafði þetta að segja á Facebooksíðu sinni í morgun:

„Mikið af alls konar dellumakeríi kemst á dagskrá þingsins stuttu fyrir þinglok vegna hótana um málþóf ella. Gott dæmi um það er þingsályktunartillaga um borgaralaun, sem mun þýða skilyrðislausa grunnframfærslu fyrir alla án nokkurs endurgjalds. Tillagan kemur frá fólki sem telur dugnað vera úrelt fyrirbæri og tækniþróunin leiði til þess að aðeins örfáir þurfi að vinna,“

sagði Brynjar, en hann hefur áður tjáð sig um meinta leti Pírata:

„Áberandi er hópur þingmanna sem telur sig sérstakt baráttufólk fyrir bættum vinnubrögðum og aukinni virðingu alþingis. Flest eiga þau nú samt sameiginlegt að hafa varla unnið ærlegt handtak um ævina og finnst dugnaður ofmetinn, ef ekki úreltur.“

Þá segir Brynjar að hann hafi engan áhuga á slíku letilífi sjálfur, sem borgaralaun fælu í sér:

„Þótt letilíf eigi ágætlega við mig hef ég engan áhuga á því að aðrir borgi undir það fyrir mig. Svo er tækniþróun ekki nýtt fyrirbæri og þótt hún leiði til færri starfa á einstökum sviðum býr hún til ný störf á öðrum. Þetta vita allir sem hafa aðeins gluggað í hagsöguna.“