Í Staksteinum Morgunblaðsins segir að gerð myndbanda um borgarlínuna og að setja Miklubraut í stokk, sem voru ein helstu kosningamál Samfylkingarinnar í borginni í aðdraganda sveitastjórnarkosninga, hafi verið kostuð af Reykjavíkurborg. Er látið að því liggja að Samfylkingin hafi nýtt sjóði Reykjavíkurborgar í eigin þágu.
Marta Guðjónsdóttir, borgarfulltrúi Sjálfstæðisflokksins, spurðist fyrir um kostnaðinn við gerð myndbandanna, en fékk ekki svör fyrr en eftir kosningar:
„Gagnsæ stjórnsýsla borgarinnar þar sem allt á að vera fyrir opnum tjöldum veitir ótrúlegt svigrúm fyrir misnotkun og pukur. Hið sama má segja um lög um fjármál stjórnmálaflokka, sem setja þá sem vilja fara eftir þeim í spennitreyju en hindra hina ekki í að nota háar fjárhæðir til að kynna baráttumál sín. Marta Guðjónsdóttir, borgarfulltrúi Sjálfstæðisflokksins, spurðist fyrir um kostnað við myndbönd sem borgin lét framleiða í aðdraganda kosninganna. Myndböndin fjölluðu um tvö helstu kosningamál Samfylkingarinnar, borgarlínu og Miklubraut í stokk. Svo heppilega vildi til – fyrir Samfylkinguna og borgarstjóra – að svar við fyrirspurn Mörtu barst ekki fyrr en eftir kosningar. Þá kom í ljós að kostnaðurinn við þessi kosningamyndbönd Samfylkingarinnar var 4,2 milljónir króna,“
segir í Staksteinum og gefur höfundur í skyn að hefðu upplýsingarnar legið ljósar fyrir kosningar, hefði það hugsanlega getað breytt úrslitunum. Hefði það væntanlega verið Sjálfstæðisflokknum í vil, sem er á móti borgarlínunni.
Þar segir einnig að kostnaðurinn við myndböndin hafi bæst við þær 12.8 milljónir sem fóru í kynningu á borgarlínunni á sýningunni Verk og vit:
„Þessi kostnaður bætist við enn hærri kostnað, 12,8 milljónir króna, sem Reykjavíkurborg, eitt sveitarfélaga, lagði út fyrir í vor til að taka þátt í sýningunni Verk og vit. Þær milljónir fór einnig í að kynna borgarlínuna, meðal annars með sérstökum Borgarlínubjór! Samtals eyddi borgin, undir stjórn Samfylkingarinnar, því 17 milljónum króna af skattfé, bara í þennan kosningaáróður fyrir flokkinn, skömmu fyrir kosningar.“
