Björn Leví Gunnarsson, þingmaður Pírata, skrifar hugleiðingar sínar um kjör þingmanna á Facebooksíðu sinni í gær. Þar reifar hann þá skoðun sína að gott sé að leggja niður kjararáð, en honum lítst ekki á að þingmenn skuli ákveða eigin laun á ný.
Tilefnið er frétt Stundarinnar um að Davíð Oddsson, ritstjóri Morgunblaðsins, sé launahæsti fjölmiðlamaður landsins með 5,7 milljónir á mánuði, þar sem eftirlaun hans sem fyrrum forsætisráðherra, eru stór hluti þeirrar summu.
Björn deilir fréttinni á síðu sinni og gefur álit sitt á eftirlaunalögunum umdeildu frá árinu 2003, í tíð Davíðs Oddsonar sem forsætisráðherra. Samkvæmt þeim voru eftirlaun „þaulsetinna forsætisráðherra sérstaklega hækkuð umfram aðra ráðherra,“ segir í fréttinni. Lögin voru afnumin árið 2009 af ríkisstjórn Jóhönnu Sigurðardóttur.
Björn Leví segir að eftirlaunalögin hafi líklega verið ólögleg:
„Svona var sjálftakan grímulaus, af blárri hendi þeirra sem þykjast vita mest og best um stöðugleika og aðhald í fjármálum. Því miður er ekki hægt að vinda ofan af þessum réttindum en maður myndi halda að svona sjálftaka væri ekki bara siðlaus heldur líka ólögleg. Þannig er ábyrgð þingsins, ekki bara lagasetning, heldur sannfæring. Var þetta sannfæring þeirra þingmanna sem samþykktu þetta? Myndu þeir gera þetta aftur?“
Í framhaldinu veltir Björn Leví því fyrirsér hvað taki við af kjararáði, sem, lagt verður niður þann 1. júlí. Hann segir það aftur verða á ábyrgð þingmanna að ákveða eigin laun:
„Nú á að leggja niður kjararáð, sem er gott út af fyrir sig af því að það hefur algerlega brugðist hlutverki sínu. En hvað tekur við? Miðað við tillögur sem liggja fyrir þá munu þingmenn aftur þurfa að ákveða breytingar á eigin launum. Hversu lengi mun það endast? Hvers vegna ekki að setja kjararáði þau takmörk sem þinginu er gert að miða við í stað þess að fara aftur í að láta þingmenn kjósa um eigin laun? Ég styð svo sem að leggja niður kjararáð … en það er ekki sjálfgefið að það sem komi í staðinn verði betra.“