Davíð Oddsson, ritstjóri Morgunblaðsins, segir að það þurfi að leiða saman Framsóknarflokkinn og Miðflokkinn, á meðan þessir flokkar séu ósáttir við hvorn annan þá er erfiðara fyrir Framsókn að mynda meirihluta til hægri, bæði í borg og ríki. Davíð er nú í viðtali við Pál Magnússon á útvarpsstöðinni K100, sem er hluti af Morgunblaðinu.
Davíð, sem var borgarstjóri Reykjavíkur á árunum 1982 til 1991, segir það verða erfitt fyrir Sjálfstæðisflokkinn að verða aftur stöðugt stærsti flokkurinn í borginni. Gaf hann í skyn að kjósendur myndu refsa Sjálfstæðisflokknum vegna þess að flokkurinn hafi ekki staðið sig nógu vel í minnihluta á kjörtímabilinu sem er að ljúka.
Varðandi stöðuna í landsmálunum þá segir Davíð að það hefði verið erfitt að mynda aðra ríkisstjórn en þá sem situr núna, hafi það aðallega strandað á Sigurði Inga Jóhannssyni, formanni Framsóknarflokksins, sem hafi ekki verið tilbúinn til samstarfs við Miðflokkinn. Segir Davíð að best væri að leiða þessa flokka saman, annars yrði Framsókn alltaf opnari fyrir samstarfi til vinstri, bæði í ríkisstjórn og borgarstjórn.