Eins og kom fram í pistli hér í gær er nú auglýstur þáttur á útvarpsstöðinni K100 þar sem Páll Magnússon, núverandi þingmaður og fyrrverandi útvarpsstjóri, ræðir við Davíð Oddsson.
Páll er mjög ritfær maður, vel lesinn í fornbókmenntum, og hann kann að velja orð sín þegar honum hitnar í hamsi. Ég myndi meira að segja halda því fram að Páll sé betri stílisti á íslenska tungu en Morgunblaðsritstjórinn sem þó hefur gefið út smásagnasöfn og ort sálma.
Páll skrifaði til dæmis um Davíð Oddsson árið 2012, en þá var hann útvarpsstjóri:
Það er ekki lengur hægt að svara því sem frussast út um samanbitna kjálkana á Davíð þegar hann fjallar um RÚV. Þetta er eins og það skrýtnasta í kveðskap Æra-Tobba – eitthvað illskiljanlegt og samhengislítið garg út í loftið. En Tobbi verður að njóta sannmælis. Flest það sem hann samdi er auðvitað miklu gáfulegra en heiftarþruglið í Reykjavíkurbréfum Davíðs.
Nú er spurning hvort Ríkisútvarpið ber á góma í samtali þeirra Páls og Davíðs?