Samkvæmt nýrri könnun Fréttablaðsins mælist Sjálfstæðisflokkurinn stærstur í Hafnarfirði, með 32 prósent fylgi. Samfylking kemur þar á eftir með rúm 19 prósent. Samkvæmt útreikningum er óljóst hvor flokkurinn missir mann ef þetta yrðu kosningarúrslit, það stendur á jöfnu, en það yrði annaðhvort fimmti maður íhaldsins, eða þriðji maður jafnaðarmanna.

Framsókn og óháðir fá tæp 12 prósent, Miðflokkur og Píratar tæp 10 prósent og Vinstri grænir rúm átta prósent. Allir þessir flokkar næðu inn manni ef þetta yrðu úrslitin.

Viðreisn mælist með tæplega sex prósent og Bæjarlistinn rúmlega þrjú prósent, en hvorugur listinn nær inn manni með því fylgi.

Sex flokkar fengu því mann kjörinn samkvæmt þessu, í stað fjögurra nú.

Í sögulegu samhengi er Framsóknarflokkurinn (og óháðir) sigurvegari könnunarinnar, þar sem stutt er í næsta mann, en flokkurinn hefur ekki riðið feitum hesti í Hafnarfirði frá örófi alda.

Í kosningunum árið 2014 var niðurstaðan þessi:

Sjálfstæðisflokkurinn= 35,8 %  5 fulltrúar

Samfylkingin= 20,2%                 3 fulltrúar

Björt framtíð= 19                         2 fulltrúar

Vinstri grænir= 11,7%                 1 fulltrúi

Píratar =  6,7 %                            0 fulltrúar

Framsókn= 6,5 %                       0 fulltrúar

Hringt var í 1.089 manns með lögheimili í Hafnarfirði þar til náðist í 803 hinn 14. maí. Svarhlutfallið var 73,7 prósent. Þátttakendur voru valdir með slembiúrtaki úr þjóðskrá. Svarendur skiptust jafnt eftir kyni og hlutfallslega eftir aldri. Alls tóku 50,6 prósent þeirra sem náðist í afstöðu til spurningarinnar. Þá sögðust 13,1 prósent ekki ætla að kjósa eða ætla að skila auðu, 21,3 prósent sögðust óákveðin og 14,9 prósent vildu ekki svara spurningunni.