Morgunblaðið segir frá því að dýrustu íbúðirnar á Hafnartorgi muni kosta 400-500 milljónir króna. Forstjóri ÞG verks sem byggir húsin telur að þarna sé áður óþekktur „lúxus“ á Íslandi. Og víst er það rétt – við höfum ekki heyrt svona íbúðaverð áður á Íslandi.
Byggingakostnaðurinn hlýtur að vera nokkuð hár – en hann hefur þó altént ekki farið í að skreyta húsin að utanverðu eða gera þau meira aðlaðandi. Maður hefur til dæmis ekki heyrt að listamenn hafi verið kallaðir að til að fegra umhverfið.
Það er svo spurning hvort nokkur vill kaupa íbúðir á þessu verði? Kannski erlendir auðkýfinga? Eitt af auglýsingaslagorðunum sem hefur heyrst í sambandi við Hafnartorg er pied-à-terre – það útleggst sem staður þar sem auðmenn geta tyllt niður fæti.
Ég fór í göngutúr í kringum Hafnartorg í gærkvöldi. Það hafa aðallega sést myndir af húsinu sem snýr að Arnarhóli. Það verður að segjast eins og er að það er nánast eins og Versalir í glæsileika sínum miðað við húsin sem eru fyrir aftan og snúa að Geirsgötunni. Manni skilst að þar verði mestu lúxusíbúðirnar.
Arkitekt Hafnartorgs er Pálmar Kristmundsson. Hann er meðal annars þekktur fyrir að teikna sumarbústaði fyrir ríkt fólk. Efst á byggingunum sem eru eins og kubbar í laginu er líkt og sé búið að tylla sumarbústöðum – eins og sjá má dúkkar timburklæðning allt í einu upp þarna á þakinu.