Barnavernd Reykjavíkur er hástökkvari ársins þegar kemur að valinu á Stofnun Ársins Borg og Bær 2018. Valið er samvinnuverkefni SFR stéttarfélags, VR, fjármálaráðuneytisins og Félagsbústaða hf. og starfsmannafélags Reykjavíkurborgar. Starfsmönnum Reykjavíkurborgar hefur gefist kostur á að kjósa um stofnun ársins í átta ár og að þessu sinni var Norðlingaskóli fyrir valinu. Í öðru sæti var Frístundamiðstöðin í Gufunesbæ og þriðja sætið hlaut Orkuveita Reykjavíkur.
Sú stofnun sem hækkar sig mest á milli ára er Barnavernd Reykjavíkur, en hún hoppar upp um 14 sæti, úr því 27 í það 13, milli ára. Árið 2016 var Barnavernd Reykjavíkur í 15. sæti sömu könnunar. Þessi niðurstaða er áhugaverð, þar sem mikill styr hefur staðið um stofnunina undanfarið, þar sem störf forstjóra Barnaverndar, Braga Guðbrandssonar, hafa verið gagnrýnd, en hann er í ársleyfi frá störfum, meðan framboð hans til Barnaréttarnefndar Sameinuðu þjóðanna er í vinnslu.
„Könnunin er stærsta reglulega vinnumarkaðskönnun sem framkvæmd er hér á landi og gefur mikilvægar upplýsingar um stöðu starfsmanna á vinnumarkaði. VR hefur útnefnt Fyrirtæki ársins í 21 ár og SFR hefur staðið fyrir vali á Stofnun ársins síðastliðin 12 ár en eins og áður sagði þá er þetta í 8 sinn sem St.Rv. stendur fyrir vali á Stofnun Ársins. Með því að taka þátt í þessu samvinnuverkefni þá gefst St.Rv. tækifæri til að bera saman viðhorf félagsmanna sinna og félagsmanna VR og SFR,“
segir á vef Reykjavíkurborgar.