Kolbrún Baldursdóttir ritar:
Vanlíðan barna sem tengist skólanum beint er á ábyrgð borgarmeirihlutans. Skóli án aðgreiningar er fyrirkomulag sem ekki hefur gengi upp því uppbygging var í skötulíki og það sem fylgja þurfti með til að fyrirkomulagið virkaði, fylgdi aldrei með.
Börn með sérþarfir hafa ekki fengið þann stuðning sem þau þurfa til að geta notið sín í almennum bekk þar sem fjárveitingar skortir til að sinna þeim og mæta þörfum þeirra. Skólinn fær kannski fjármagn til að greiða stuðningsaðila laun en oft nær það ekki mikið lengra. Vandinn hefur verið sá að borgin hefur ekki metið alla kostnaðarliði í skólastarfinu þegar fjárhagsáætlun er gerð.
Vaxandi vandi barna er því ekki kennurum eða skólastjórnendum að kenna heldur þeim þrönga stakki sem þeim er ætlað að vinna eftir. Málaflokkurinn hefur verið sveltur.
Flokkur fólksins vill tryggja að námsþörfum allra barna verði mætt. Skóli án aðgreiningar er ekki að virka fyrir öll börn. Við verðum að fara að horfast í augu við þennan vanda. Stækkandi hópur barna glímir við kvíða, viðhefur sjálfsskaða, eru með sjálfsvígsgælur og sumum líður svo illa að þau gera tilraunir til sjálfsvígs.
Við í Flokki fólksins líðum ekki slík mannréttindabrot. Mæta skal þörfum allra barna á þeirra forsendum og ekkert barn skal þurfa að líða illa fimm daga vikunnar, dagana sem skóli er. Kvíði sem er beintengdur við að mæta í skólann til náms, námsefnis og félagslegrar samveru sem passar þér ekki og þar sem þú ert ekki meðal jafningja mun fljótlega brjóta þig.
Kolbrún Baldursdóttir skipar 1. sæti Flokks fólksins