Össur Skarphéðinsson, fyrrverandi formaður Samfylkingarinnar, segir að Píratar sem vilji bylta kerfinu eigi að kjósa Sósíalistaflokkinn í borgar- og sveitastjórnarkosningunum í vor. Píratar séu enda orðnir kerfisflokkur. Þá telur Össur að það sé mikill kostur að Gunnar Smári Egilsson, stofnandi Sósíalistaflokksins, sé ekki í framboði fyrir flokkinn.
Össur skrifar örfáar línur um þetta á Facebook en tekst að koma miklu efni að í fáum orðum: hugsanlega að móðga tvo stjórnmálaflokka um leið og hann gerir grein fyrir væntanlegu atkvæði sínu. Pistillinn er svohljóðandi:
Ef ég væri Pírati og vildi bylta kerfinu myndi ég líklega kjósa Sósíalistaflokkinn í vor. Sérstaklega af því það virðist ekki vanta nema prósentubrot til að sossarnir nái manni í borgarstjórn. Píratar eru orðnir meðvirkur kerfisflokkur meðan Sossarnir eru ekta byltingarsinnar, lúnir af lamstri stéttabaráttunnar og vilja steypa auðvaldinu. Tötraöreigarnir, svo vitnað sé í gamlan spámann, þurfa málsvara á tímum sem eru án eldmóðs. Svo á Sósíalistaflokkurinn líka umbun skilda fyrir þá pólitísku smekkvísi að hlífa þjóðinni við því að hafa handhafa sannleikans, Gunnar Smára, í framboði. Hann er þó að læra mannasiði. Sjálfur er ég sósíaldemókrati dauðans, og kýs minn Dag í vor. – Öll vor ef því er að skipta. Lifi stéttabaráttan!