Hér er myndband þar sem eru klippt saman brot af þeim linnulausa áróðri sem er rekin gegn Evrópu í sjónvarpi í Rússlandi. Þarna er mikið talað um að Evrópa sé full af barnaníðingum, þá sé ekki síst að finna meðal valdamanna, að börn séu tekin frá fjölskyldum sínum og gefin samkynhneigðu fólki og jafnvel að börnum sé stolið frá Rússlandi.
Af umfjölluninni mætti halda að Evrópa sé algjörlega siðlaus og full af nýnasistum. Norðurlöndin eiga að vera sérstakt sorabæli. Í einni „fréttinni“ sem vitnað er í segir að sifjaspell hafi verið lögleyfð á Íslandi og í Noregi.
„Fréttir“ af þessu tagi birtast á sjónvarpsstöðvunum sem lúta Kremlarvaldinu. Það breytir engu að þetta á enga stoð í veruleikanum – allt er þetta sett mjög fréttalega fram. Þarna er fullyrt að á þremur stærstu sjónvarpsstöðvunum sé talað um Evrópu á neikvæðan hátt að meðaltali átján sinnum á dag.