Ný skoðanakönnun sem birtist í Fréttablaðinu bendir til þess sama og fyrri könnun sem ég skrifaði um hér á síðunni – að Viðreisn verði í oddastöðu eftir borgarstjórnarkosningarnar 27. maí.
Eyþór Arnalds sér smá vonarglætu í könnuninni. Sjálfstæðisflokkurinn er með 30 prósent, fengi 8 borgarfulltrúa, en svo er Miðflokkurinn með 2 borgarfullrúa. Framsókn er mjög nærri því að ná inn borgarfulltrúa. Miðað við málflutninginn í kosningabaráttunni eiga þessir flokkar samleið.
Núverandi meirihluti er fallinn, samkvæmt könnuninni. Samfylking, Píratar og VG fengju samanlagt 11 borgarfulltrúa, vantar einn upp á meirihlutann. Líklega myndu meirihlutaflokkarnir reyna að ná samningum við Viðreisn. Viðreisn fær 2 menn kjörna samkvæmt könnuninni.
Ekkert af hinum fjölmörgu nýju framboðum nær að brjótast í gegn, ef marka má könnun Fréttablaðsins. Þau eru öll með afar lítið fylgi. Það er líka spurning hvort það breytist. Þegar svo margir flokkar eru í framboði er erfitt að gera sig sýnilegan.
Það verður svo að nefna að einungis 50,8 prósent þeirra sem voru spurðir í könnuninni tóku afstöðu. Margir eru óákveðnir. Svo er önnur breyta, nefnilega sú að kjörsókn í borgarstjórnarkosningum hefur verið dræm, það er möguleiki að hún fari undir 60 prósent núna.