Styrmir Gunnarsson, fyrrum ritstjóri Morgunblaðsins, segir að Rússar muni bregðast við loftárásum Bandaríkjanna, Bretlands og Frakklands í Sýrlandi, með upplýsingastríði og tölvuárásum, þar sem hefðbundið stríð sé þeim um megn, efnahagslega.
Ísland, sem NATO ríki, studdi hernaðaraðgerðirnar í Sýrlandi og telja erlendir stjórnmálaskýrendur að Rússar muni bregðast við hernaðaraðgerðunum með einhverjum hætti. Styrmir vitnar í bresku pressuna, sem talar um tölvuárásir og upplýsingastríð og spyr síðan hvort stjórnvöld á Íslandi hafi gert ráðstafanir til að mæta slíkum aðgerðum:
„Ljóst er að helztu stórveldi í heiminum hafa lengi búið sig undir að til þessa mundi koma og hafa gert ráðstafanir til að heyja slík stríð en líka að verjast þeim. Það verður fróðlegt að sjá, hvort nú sé komið að kaflaskilum í stríðssögunni. Augljóst er að slíkt stríð er hægt að heyja gegn örríki eins og Íslandi og spurning hvort íslenzk stjórnvöld hafi gert einhverjar ráðstafanir til að mæta slíkum aðgerðum. Kannski er það mikilvægari spurningar heldur en þær sem utanríkismálanefnd Alþingis var að ræða í gærkvöldi. Og athyglisvert að fylgjast með því, hvort einhver þingmaður sér tilefni til að bera slíka fyrirspurn fram á Alþingi.“
Styrmir segir að búast megi við að Rússar svari fyrir sig:
„Það er ljóst af fréttum brezkra blaða um helgina, að brezk stjórnvöld búast við að svör Rússa við loftárásum þríveldanna á efnavopnamiðstöðvar í Sýrlandi og refsiaðgerðum vegna eiturefnaárásar í Bretlandi verði upplýsingastríð og tölvuárásir á mikilvæg gagnakerfi svo sem þau sem stjórna umferð í lofti, mikilvægum innviðum samfélaga á Vesturlöndum, sjúkrahúsakerfum o.sv. frv. Brezkar eftirlitsstöðvar telja sig þegar hafa orðið varar viðstóraukna starfsemi, sem mundi flokkast undir upplýsingastríð frá „tröllaverksmiðjum“ í Rússlandi. Það liggur í augum uppi að Rússar hafa ekki efnahagslegt bolmagn í hefðbundið stríð gegn Vesturlöndum en öðru máli gegnir um þessa nýju tegund af stríðsátökum, sem lengi hefur verið spáð að mundu koma til sögunnar og kallað er á ensku „cyber warfare“.
Þess má geta að árið 2015 var stofnað sérstakt Netöryggisráð, hvers starf er að bregðast við netógnum. Formaður ráðsins er Sigurður Emil Pálsson.
Þá var gerð könnun á öryggi opinberra upplýsinga, kerfa og neta haustið 2016, þar sem kom í ljós að úrbóta væri þörf. Aðeins lítill hluti opinberra aðila hafði mótað sér öryggisstefnu, framkvæmt áhættumat eða úthlutað ábyrgð á upplýsingaöryggi á ásættanlegan hátt.
