Eyjan

Mestur hagvöxtur á Íslandi af Norðurlöndunum

Trausti Salvar Kristjánsson
Fimmtudaginn 8. febrúar 2018 10:16

Norðurlöndin eru að mörgu leyti frábrugðin hvert öðru

Í nýrri skýrslu Norrænu ráðherranefndarinnar, State of the Nordic Region, eru lykiltölur frá norrænu löndunum greindar og bornar saman þvert á landamæri og svæði. Í skýrslunni kemur meðal annars fram að íbúum á Íslandi fjölgaði um 10% á árabilinu 2007 til 2017 sem er yfir meðaltali á Norðurlöndum. Þessi fjölgun hefur orðið þrátt fyrir hlutfallslega færri innflytjendur en annars staðar á Norðurlöndum, þar sem fólksfjölgunin helgast að mestu leyti af alþjóðlegum fólksflutningum.

 

Í tengslum við skýrsluna er einnig unnið svonefnt Regional Potential Index en sú vísitala mælir hve góðar framtíðarhorfur allra 74 stjórnsýslusvæða Norðurlanda eru í samanburði við hvert annað. Íslensku svæðin rjúka upp listann ásamt þeim færeysku og að hluta til sænsku. Stokkhólmur er það svæði Norðurlandanna sem stendur sterkast allra. Aftur á móti falla sum svæði í Noregi langt niður listann, en Finnland vermir þó botnsætið þegar á heildina er litið.

 

Nordregio, rannsóknarstofnun Norrænu ráðherranefndarinnar um byggðaþróun og skipulag, annast samantekt skýrslunnar State of the Nordic Region sem kemur út annað hvert ár.

 

– Það kemur ekki á óvart að við sjáum greinilegan vöxt á Íslandi í samanburði við önnur norræn lönd, að hluta til vegna þess að efnahagsáfallið kom hart niður þar og að hluta til vegna innspýtingar í ferðaþjónustunni. Má því með sanni segja að þróunin hafi snúist verulega á síðustu árum, segir Kjell Nilsson, forstöðumaður Nordregio, í tengslum við útgáfu skýrslunnar.

 

– Að sjálfsögðu má velta fyrir sér hvort svo mikill hagvöxtur sé sjálfbær. Ef litið er á heildarmyndina gengur samt mjög vel víðast hvar á Íslandi. Það er ekki bara höfuðborgarsvæðið sem á velgengni að fagna eins og sjá má á Regional Potential vísitölunni okkar, bætir hann við.

 

Staðan á Norðurlöndum

Sé litið til helstu niðurstaðna í skýrslunni State of the Nordic Region er ánægjulegt að sjá að efnahagurinn jafnt og vinnumarkaðurinn standa betur á Norðurlöndum en í ESB að meðaltali. Í því sambandi gengur norrænu löndunum einnig hlutfallslega vel að laða til sín erlenda fjárfestingu – raunar renna 7% af samtölu beinna erlendra fjárfestinga (FDI) í Evrópu til Norðurlanda, þótt þar búi ekki nema 4% af íbúunum.

 

Tvennt styrkir efnahaginn: Norðurlönd eru enn sem fyrr meðal þeirra svæða í ESB sem lengst eru komin í stafrænni væðingu og við erum áfram öflugri en nálæg svæði í nýsköpun, þótt það forskot hafi minnkað. Skýrslan sýnir einnig þá miklu framtíðarmöguleika sem felast í lífhagkerfinu, en með því er átt við sjálfbæran vöxt á grundvelli náttúruauðlinda.

 

Á sumum sviðum aftur á móti hringja tölfræðilegu upplýsingarnar viðvörunarbjöllum: Þrátt fyrir flutning fólks til Norðurlanda, þ. á m. innflytjenda, fer meðalaldur hækkandi, íbúarnir setjast að í kringum stóru bæina – og svo eru áskoranir tengdar aðlögun innflytjenda í atvinnulífinu.

 

– State of the Nordic Region er samantekt þekkingar og upplýsinga sem stuðlar að heildarsýn á þróunina á Norðurlöndum og er hjálpartól norrænna valdhafa þegar þeir móta nýjar stefnur. Í skýrslunni er vakin athygli bæði á framförum og áskorunum á mikilvægum samfélagssviðum og þeim gerð skil. Þetta er norrænt samstarf þegar það er sem allra best, segir Dagfinn Høybråten, framkvæmdastjóri Norrænu ráðherranefndarinnar.

 

Staðreyndir:
State of the Nordic Region geymir einstakt safn upplýsinga um Norðurlöndin öll á sviði efnahagsmála, lýðfræðilegra breytinga, vinnumarkaðsmála og menntunar, svo að nokkuð sé nefnt, ásamt sérhönnuðum landakortum til skýringar. Skýrslan er gefin út annað hvert ár á vegum Norrænu ráðherranefndarinnar og segja má að hún mæli hitann á svæðum og sveitarfélögum á Norðurlöndum. Liður í útgáfunni er birting Regional Potential Index – sem Nordregio, rannsóknarstofnun Norrænu ráðherranefndarinnar um byggðaþróun og skipulag, tók saman – en sú vísitala mælir hve góðar horfurnar eru á hverju hinna 74 stjórnsýslusvæða Norðurlanda út frá hefðbundnum samanburðarhæfum tölfræðilegum forsendum.

 

Skýrsluna í heild má finna hér:

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af