Eyjan

Landsnet svarar Landvernd – Segir skýrslu Metsco óraunhæfa og villandi

Trausti Salvar Kristjánsson
Fimmtudaginn 11. janúar 2018 11:49

Landsnet hefur gert athugasemd við skýrslu sem ráðgjafafyrirtækið Metsco vann fyrir Landvernd um raforkukerfið á Vestfjörðum, þar sem fullyrt var að tífalda mætti raforkuöryggi með því að leggja hluta svokallaðrar Vesturlínu í jörð sem og fleiri rafmagnslínur á sunnanverðum Vestfjörðum.

 

 

 

Að sögn Steinunnar Þorsteinsdóttur upplýsingafulltrúa Landsnets, þarf að meta kosti jarðstrengja þar sem svigrúmið til jarðstrengslagna sé mismunandi:

 

„Hjá Landsneti hefur verið unnið að styrkingu á flutningskerfinu á Vestfjörðum undanfarin ár, til dæmis með byggingu varaaflsstöðvar í Bolungarvík og lagningu jarðstrengs í Bolungarvíkurgöng. Að auki er unnið að undirbúningi hringtengingar á milli norður – og suðurfjarðanna, meðal annars með sæstreng yfir Arnarfjörð og lagningu á jarðstreng í gegnum Dýrafjarðargöng. Í hringtengingunni leggjum við áherslu á að nota jarðstrengi eins mikið og kostur er vegna aðstæðna. Þegar metnar eru tengileiðir milli staða á Vestfjörðum er kostnaður vegna jarðstrengja sambærilegur við loftlínur og því mikilvægt að horft sé til kosta jarðstrengja. Tæknilegar hindranir koma þó í veg fyrir að hægt sé að leggja allar línur í jörð. Ólíkur styrkur kerfisins milli landsvæða er meginástæða þess að svigrúm til jarðstrengslagna er mismunandi. Þar sem kerfið er sterkt er meira rými til þess heldur en þar sem styrkurinn er lítill.“

 

Steinunn segir kerfið á Vestfjörðum það veikasta á landinu öllu og rekstur á jarðstrengjum reyni mikið á þolmörk kerfisins:

„Vesturlínan er um 160 km, frá Hrútatungu að Mjólká og áætlað er að hægt sé að leggja um 15 – 20 km af henni í jörðu. Fyrir nokkrum árum var lagður 12 km langur jarðstrengur í Bolungarvíkurgöng. Við rekstur á jarðstrengnum hefur reynt á þolmörk kerfisins og því hefur Landsnet góðar upplýsingar um styrk kerfisins á svæðinu.“

 

Steinunn segir skýrsluna sem unnin var fyrir Landvernd óraunhæfa og villandi og vill að stjórnvöld geri sjálfstæða úttekt á niðurstöðum skýrslunnar:

„Skýrslan sem Metsco gerði fyrir Landvernd fjallar ekkert um þessa takmörkun á lengd jarðstrengja heldur gerir ráð fyrir að hægt sé að leggja jarðstrengi á alla Vestfirði sem er óraunhæft. Staðreyndin er að einungis er hægt að leggja hluta kerfisins í jörð og því fullyrðingar um að hægt sé að tífalda afhendingaröryggi á Vestfjörðum með jarðstrengjum villandi. Öll umræða um styrkingu á kerfinu er af hinu góða en mikilvægt er að hún byggist á réttum forsendum og hvetjum við hjá Landsneti stjórnvöld til að gera sjálfstæða úttekt á niðurstöðum skýrslunnar.“

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af