Styrmir Gunnarsson, fyrrum ritstjóri Morgunblaðsins, fer yfir snautlegan árangur Sjálfstæðisflokksins í borgarstjórnarkosningum undanfarin ár á heimasíðu sinni í dag. Fylgi flokksins hefur farið hríðlækkandi með hverjum kosningum og eru margir stuðningsmenn flokksins uggandi yfir þeim doða sem einkennt hefur forystu flokksins í borginni og er gjarnan talað um leiðtogaleysi í þeim efnum. Þeir sem nefndir hafa verið í umræðunni sem möguleg borgarstjóraefni flokksins keppast nú hver af öðrum við að gefa ekki kost á sér, nú síðast Jón Karl Ólafsson, fyrrum forstjóri Icelandair.
Styrmir, sem á þá ósk heitasta að Sjálfstæðisflokkurinn ráðist í gagngera sjálfsskoðun, ekki síst gagnvart hruninu, leitar skýringa á því í pistli sínum hvernig standi á því að svo sé komið fyrir stærsta stjórnmálaflokki landsins:
„Í aðdraganda borgarstjórnarkosninga hljóta að fara fram umræður innan flokksins um það hvað valdi þessari gjörbreyttu stöðu á fylgi hans í höfuðborginni, sem áður var hans sterkasta vígi en er nú hans veikasti hlekkur. Er það vegna þess að hefðbundnir kjósendur Sjálfstæðisflokksins í Reykjavík hafi í stórum stíl flutt í nágrannasveitarfélög? Það kann að vera skýring að hluta en ekki öllu leyti. Er það vegna þess að ímynd Sjálfstæðisflokksins hafi þrengst svo mjög í huga kjósenda almennt? Árangur í borgarstjórnarkosningunum í Reykjavík í vor byggist ekki bara á frambjóðendum eða stefnumálum. Hann byggist líka á því hvort Sjálfstæðisflokkurinn gerir yfirleitt tilraun til að svara spurningum sem þessum.“