Eyjan

Varðskipið Þór færði Flateyingum ferskvatn – Vatnsskortur var yfirvofandi

Trausti Salvar Kristjánsson skrifar
Sunnudaginn 7. janúar 2018 13:00
Mynd/Landhelgisgæslan

Varðskipið Þór var í gær við störf í Flatey á Breiðafirði en heimamenn höfðu haft samband við Landhelgisgæsluna vegna yfirvofandi vatnsskorts í eynni. Áhöfn Þórs dældi þrjátíu tonnum af ferskvatni yfir í eyna. Dælingin gekk prýðilega en hún tók fimm klukkustundir og 35 mínútur. Að henni lokinni voru allir tankar í eynni orðnir fleytifullir.

Um það leyti sem Þór var að athafna sig við Flatey barst ábending um að maður í eynni hefði slasast og þyrfti á aðhlynningu að halda. Sjúkraflutningamenn úr áhöfn skipsins fóru í land á léttbát til að athuga líðan mannsins. Skoðun þeirra leiddi í ljós að hann væri líklega rifbeinsbrotinn. Svo heppilega vildi til að þyrlan TF-SYN var í gæsluflugi í grenndinni og var því ákveðið að hún sækti þann slasaða og kæmi honum til læknis. Þyrlan lenti í Flatey um kaffileytið í gær, nánar tiltekið klukkan 14:53. Um hálftíma síðar lenti svo TF-SYN á flugvellinum í Stykkishólmi. Þar beið sjúkrabíll sem flutti manninn á heilbrigðisstofnunina í bænum.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af