Fargjaldið í flugrútu Kynnisferða mun hækka þegar ferðaþjónustan fer upp um virðisaukaskattþrep, segir Björn Ragnarsson rekstrarstjóri hópbifreiða hjá Kynnisferðum í samtali við Eyjuna að það sé alveg klárt að ef virðisaukaskatturinn hækki úr 11% í 24% þá mun það leiða til beinnar hækkunar á verðum fyrirtækisins til viðskiptavina.
Þó að stór hluti okkar viðskiptavina séu erlendir ferðamenn þá eru Íslendingar líka að nýta sér þjónustu rútufyrirtækja og mun þetta því líka hafa áhrif á þá,
segir Björn vongóður um að fyrirhuguð hækkun verði dregin til baka en Benedikt Jóhannesson fjármála- og efnahagsráðherra þvertók fyrir það í þætti Eyjunnar nýverið.
Stærsti hluti kostnaðar Kynnisferða er í íslenskum krónum og segir Björn að mikil styrking krónunnar hafi gert það að verkum að verð á vörum fyrirtækisins hafi hækkað gagnvart erlendum ferðamönnum:
Vissulega þarf að sporna við styrkingu krónunnar en við teljum að þetta sé ekki rétt aðferð. Þó að mikill vöxtur hafir verið í fjölda ferðamanna til landsins á undanförnum árum þá er Ísland langt á eftir mörgum ferðamannastöðum. Ísland sem áfangastaður er í samkeppni við marga aðra áfangastaði og geta svona aðgerðir valdið algjöru hruni í fjölda ferðamanna til landsins.