Eigendur Krónunnar og Elko hafa ekki áhyggjur af áhrifum komu bandaríska verslunarrisans Costco á íslenskan smásölumarkað. Í dag eru rúmar þrjár vikur þangað til Costco opnar í Kauptúni í Garðabæ og eru margir íslenskir neytendur orðnir mjög spenntir.
Miðað við fyrri dæmi úr verslunarsögu Íslands, til dæmis þegar leikfangaverslunin Toys R‘ Us opnaði árið 2007 og þegar fatabúðin Lindex opnaði árið 2011, þá má gera ráð fyrir miklum fjölda fyrstu dagana eftir opnun.
Fyrr í vikunni var greint frá því að Hagar hf, sem eru eigendur Hagkaups hafa fest kaup á öllu hlutafé Olís til að bregðast við samkeppni frá Costco. Sama gildir um kaup Haga á Lyfju, en Costco mun opna bensínstöð og erlendis er Costco með lyfsölu og reikna má með að það verði einnig hér á landi.
Bestu verslanirnar á pari við ársvöxt í smásölu
Jón Björnsson forstjóri Festi hf., sem m.a. á Krónuna og Elko, segir í samtali við Morgunblaðið í dag að menn séu að oftúlka áhrif Costco:
Menn eru að tala um mjög breyttar aðstæður með tilkomu Costco. Þetta er nú bara ein búð, þótt hún verði að vísu stór. Við höfum vitað af áformum Costco um að koma hingað í þrjú eða fjögur ár og ekki verið neitt taugaveiklaðir vegna þeirra áforma,
sagði Jón í samtali við Morgunblaðið. Ekki liggi fyrir á hvaða verði Costco hyggst selja vörur sínar á hér á landi, erlendis sé álagningin svipuð og hjá Krónunni og Elko sem þýði að ef Costco er með sama innkaupsverð og smávöruverslanir hér á landi eru með í dag þá ætti ekki að vera mikið vandamál að keppa við þá. Íslenski smásölumarkaðurinn velti 400 milljörðum á ári, bestu verslanir Costco erlendis velti 10 til 12 milljörðum á ári og þó verslunin í Kauptúni verði arðbærasta verslun Costco í heiminum þá yrði hlutfall þeirra á íslenskum markaði á pari við eðlilegan ársvöxt í smásölu. Jón segir að þar að auki þekki rekstraraðilar Krónunnar og Elko íslenska neytendur betur en bandaríski risinn:
Íslenskir neytendur skipta okkur miklu meira máli, heldur en þeir munu nokkurn tíma skipta Costco. Við eigum allt undir því að íslenskum neytendum geðjist að okkur. Það höfum við alltaf vitað.