Líkt og Eyjan fjallaði um, þá sendi Loðnuvinnslan í Fáskrúðsfirði frá sér yfirlýsingu í vikunni, þar sem þeir lýstu áhyggjum sínum yfir fyrirhuguðu laxeldi í firðinum og menguninni sem af því hlytist. Var fullyrt að mengunin af 15.000 tonna laxeldi jafngilti skólpi frá 120.000 manna byggð og hefði þar með áhrif á hrognavinnsluna, sem reiðir sig á hreinan sjó.
Fiskeldi Austfjarða, sem á ónýtt 3000 tonna eldisleyfi á Fáskrúðsfirði og stefnir á að ala þar 11.000 tonn af laxi, sendi í dag frá sér yfirlýsingu þar sem því er hafnað að mengunin frá laxeldinu hafi áhrif á starfsemi Loðnuvinnslunar. Er vísað til rannsókna fyrirtækisins í Berufirði máli sínu til stuðnings, með aðkomu IRIS, alþjóðlegrar rannsóknarstofnunar Stavanger í Noregi.
Í yfirlýsingu Fiskeldis Austfjarða er fullyrt að úrgangur frá laxeldinu muni ekki hafa nein áhrif á aðra starfsemi:
„Misskilnings virðist gæta um áhrifasvæði sjókvíaeldis og áhrif þess á fjarðarumhverfi. Úrgangurinn fellur að mestu á botninn innan við 50 metra frá kvíunum og eyðist þar á hvíldartíma þegar eldistöku lýkur. Í stuttu máli sagt þá eru allar kannanir samhljóma og niðurstaðan er að lítilla áhrifa gætir í meira en 100 m fjarlægð frá kvíastæði og alls engra áhrifa gætir þegar komið er í 350 m fjarlægð. Vatnsinntak Loðnuvinnslunnar er 6,7 km frá næstu kvíum.“
Þar segir einnig:
„Við eldi á 15.000 tonnum af laxi í sjókvíum þarf 16.500 tonn af fóðri. Mestur hluti þessa fóðurs fer í vöxt eldisfisksins en hluti fellur til botns ásamt saur fisksins. Þekkt er að heildarmagn úrgangsefna á föstu formi (mest kolefni, fosfór og nitur) frá 15.000 tonna eldi er um 1.650 tonn á ári sem falla á botninn. Aðeins lítill hluti næringarefna (nitur og fosfór) leysist upp í sjónum og dreifist með straumum og út fjörðinn.“