Samtök atvinnulífsins hafa reiknað út að árlegur kostnaður við stjórnarsáttmálann nemi 90 milljörðum króna. Þá er miðað við þann tímapunkt þegar allar boðaðar aðgerðir eru komnar til framkvæmda. Þetta segir Halldór Benjamín Þorbergsson framkvæmdarstjóri SA við Viðskiptablaðið í dag.
Hann segir að samtökin hafi farið vel yfir stjórnarsáttmálann en sakni þess að ekkert sé talað um aðhald og niðurgreiðslu skulda, því á toppi hagsveiflunnar þurfi að sýna ráðdeild, þar sem vaxtabyrði Íslands sé ein sú mesta meðal OECD ríkjanna.
„Við teljum að árlegur kostnaður við sáttmálann, og þær aðgerðir sem í honum eru boðaðar, nemi um 90 milljörðum króna þegar þær eru allar að fullu komnar til framkvæmda. Í þessu mati okkar erum við að miða við þær forsendur sem lesa má út úr stjórnarsáttmálanum en þær eru ekki tæmandi. Okkur sýnist því að verið sé að bæta verulega í útgjöldin. Kostnaðarsömustu liðirnir tengjast samgöngum, fjarskiptum og byggðamálum, en einnig heilbrigðismálum, sem og mennta- og menningarmálum,“
sagði Halldór.