Á dögunum var gerð úttekt á opinberum vefjum á Íslandi af samgöngu- og sveitastjórnarráðuneytinu og Sambandi Íslenskra sveitafélaga. Er þetta í sjötta skiptið sem slík úttekt er framkvæmd, eða annað hvert ár frá árinu 2005. Alls voru 239 vefir metnir, 16 færri en 2015 og var svarhlutfall 80% en 48 aðilar sendu ekki inn svör af þeim sem fengu spurningalista.
Besti ríkisvefurinn var valinn Stjórnarráð Íslands eða stjornarradid.is
Um vefinn sagði dómnefnd þetta:
„Mjög gott aðgengi er að upplýsingum á vefnum og flokkar skýrir. Auðvelt er að ná í upplýsingar frá miklu gagnamagni. Auðvelt að ná yfirsýn fyrir fjölþætta starfsemi stjórnarráðsins. Stílhrein hönnun vefsins er lýsandi fyrir hlutverk stjórnarráðsins og skipulag stjórnsýslunnar kemur vel fram. Litanotkun er einföld og í samræmi við hlutverk hans. Myndir gefa vefnum mannlegan blæ. Í heildina litið virkar vefurinn traustur og þjáll á notandann.“
Besti vefur sveitarfélags var Reykjavík eða reykjavik.is
Um vefinn sagði dómnefnd:
„Mjög auðvelt aðgengi er að upplýsingum, sérstaklega þegar miðað er við að mikið magn upplýsinga er á vefnum. Auðvelt er að finna fyrirfram ákveðið efni. Öflugur fréttaflutningur úr borginni er á vefnum. Forsíða er vel skipulögð og valmyndir skýrar. Notað er orðalag notenda í fyrirsögnum, sem talar við notendur. Hönnun vefsins er skýr og litanotkun er góð. Gott er að styðja notendur með litum flokka. Samspil ljósmynda og táknmynda er vel útfært á vefnum. Í heildina litið er góð upplifun af notkun vefsins.“
Dómnefnd skipaði Marta Kristín Lárusdóttir, lektor í Háskólanum í Reykjavík; Tinni Sveinsson, þróunarstjóri 365 og Margrét Kristín Sigurðardóttir, forstöðumaður almannatengsla hjá Samtökum iðnaðarins.
Tilgangur og markmið úttektarinnar var að: „greina stöðu opinberra vefja á landinu. Úttektinni er ætlað að veita heildstæða yfirsýn yfir það hvernig opinberir vefir uppfylla kröfur um innihald, nytsemi, aðgengi og rafræna þjónustu og gera opinberum aðilum grein fyrir stöðu sinni í samanburði við aðra. Markmið úttektarinnar er að meta hvernig vefir hins opinbera standa og styðja við þróun rafrænnar þjónustu í
samræmi við stefnu ríkisstjórnarinnar þar að lútandi.“
Meira má lesa um niðurstöður og framkvæmd úttektarinnar hér.