Eyjan

Sjá ekkert til fyrirstöðu í samrunum matvöruverslana og bensínstöðva

Ari Brynjólfsson skrifar
Fimmtudaginn 23. nóvember 2017 17:45
Samsett mynd/DV

Samkeppniseftirlitið sér ekkert því til fyrirstöðu að Hagar, sem reka meðal annars verslanir Bónus og Hagkaup, renni saman við Olís, sem rekur 72 bensínstöðvar um allt land. Sama gildir um samruna N1 og Festi, sem rekur meðal annars verslanir Elko og Krónunnar. Óskar Samkeppniseftirlitið nú eftir sjónarmiðum vegna samrunananna og er frestur gefinn til 7. desember næstkomandi.

Nokkuð er rætt um verslun Costco í Kauptúni sem rekur bensínstöð. Hefur Festi tölur frá Rannsóknarsetri verslunarinnar um að verslun Costco sé með rúmlega 6,5% til 7% markaðshlutdeild hér á landi. Telja Hagar að Costco sé að nota stöðu sína sem einn stærsti aðili í smásölu á heimsvísu til að undirverðleggja vörur á borð við Appelsín, Smjörva og Heimilisbrauð.

Eina hindrunin sem Samkeppniseftirlitið fjallar um er að samruni fyrirtækja geti haft í för með sér aðgangshindranir á markaði. Að öðru leyti munu samrunarnir ekki hafa áhrif á samkeppni þar sem sala á matvöru á bensínstöðvum sé ekki sambærileg því sem gerist í verslunum Bónuss og Krónunnar, þar að auki hafi Hagar og Festi ekki selt eldsneyti og því hafi samrunarnir ekki áhrif á eldsneytismarkaðinn.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af