Eyjan

Vilja setja milljarð á ári í baráttu gegn ofbeldi

Ari Brynjólfsson
Fimmtudaginn 12. október 2017 17:15

Helga Vala Helgadóttir oddviti Samfylkingarinnar.

Samfylkingin vill setja einn milljarð króna á ári í baráttu gegn ofbeldi í samfélaginu. Fram kom í yfirlýsingu Ágústs Ólafs Ágústssonar oddvita flokksins í Reykjavíkurkjördæmi suður í lok spetember að Samfylkingin myndi setja kynferðisofbeldi á oddinn en á fundi í Lögbergi í Háskóla Íslands var áherslan útfærð. Helga Vala Helgadóttir oddviti Samfylkingarinnar í Reykjavíkurkjördæmi norður segir í samtali við Eyjuna að Samfylkingin vilji setja milljarð á ári í baráttuna gegn ofbeldi:

Við ætlum að setja einn milljarð árlega í málaflokkinn sem að mun annars vegar fara í að efla löggæslu, fjölga lögregluþjónum og hækka laun þeirra til samræmis við þeirra framlag. Við ætlum að fara inn í skólakerfið, ekki með mánaðarátak gegn ofbeldi, heldur inn í námið í grunnskóla, menntaskóla og háskóla þar sem verður fræðsla um ofbeldi, bæði fyrir gerendur og þolendur nútíðar, fortíðar og framtíðar,

segir Helga Vala. Á hún við allar tegundir af ofbeldi, kynferðisofbeldi, heimilisofbeldi og netofbeldi:

Svo ætlum við líka að auka framlag til neyðarmóttöku og samræma móttöku brotaþola í heilbrigðiskerfinu um allt land.

Helga Vala segir að upphæðin sé ekki of há, þetta sé aðeins byrjunin. Langtímamarkmiðið sé að fjölga lögregluþjónum umtalsvert, efla þjálfun og hækka laun þeirra.  Hún segir að þetta mál sé henni persónulega hugleikið þar sem hún hafi sem lögmaður þekki kerfið vel:

Ég hef verið að vinna á neyðarmóttöku kynferðisofbeldis, geng þar bakvaktir á sex vikna fresti í viku í einu, þannig að ég þekki þetta kerfi vel. Ég finn það mikið, sérstaklega hjá löggunni að þar er svakalegt álag, rosalega mikil þreyta. Fólk er bæði að hverfa til annarra starfa og fara í langtímaveikindi því þessi hópur hefur verði skilinn eftir.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af