Fulltrúar Pírata í borgarstjórn Reykjavíkur segja að ríkisstjórnin hafi staðið í vegi fyrir uppbyggingu í íbúðarhúsnæði þar sem Sjálfstæðisflokkurinn hafi óbeit á Degi B. Eggertssyni borgarstjóra. Vitna fulltrúarnir í orð Jónu Sólveigar Elínardóttur varaformanns Viðreisnar sem sagði í Kosningaspjalli Vísis í gær að Sjálfstæðisflokkurin hafi staðið í vegi fyrir uppbyggingu á íbúðarhúsnæði í Reykjavík:
Sjálfstæðismenn hafa bara ekki viljað tala við Dag B. Eggertsson, borgarstjóra Samfylkingarinnar. Þess vegna hefur ekki verið ráðist í nauðsynlega uppbyggingu á íbúðarhúsnæði á höfuðborgarsvæðinu. Þess vegna hefur ekki verið hægt að úthluta þessum lóðum til borgarinnar,
sagði Jóna Sólveig. Píratar segja að um sé að ræða lóðir sem séu í eigu ríkisins á svæðum þar sem Reykjavíkurborg vilji ráðast í uppbyggingu, segja þeir þetta svívirðu:
Að fulltrúar Sjálfstæðisflokksins dragi vísvitandi lappirnar af því að þeim líkar persónulega ekki við þá sem ráða í Reykjavík er hreinasta svívirða.