Píratar vilja að „þriðja“ kynið verði formlega viðurkennt í opinberum skráningum hér á landi. Þýðir það meðal annars að á vegabréfum gefist einstaklingum kostur á því að skilgreina sig sem kvenmann, karlmann eða „þriðja“ kynið. Slíkt hefur þegar verið gert á Indlandi, Pakistan, Nepal, Ástralíu og á Nýja-Sjálandi.
Þetta atriði kemur fram í jafnréttisstefnu Pírata varðandi staðalmyndir og skapaðist nokkur umræða um málið á Fésbókarvegg Oktavíu Jónsdóttur sem skipar 2. sæti á lista Pírata í Suðvesturkjördæmi. Alda Villiljós stofandi Kynsegin Ísland vill að Píratar sleppi því að innleiða hugtakið „þriðja kynið“ þar sem í sumstaðar sé slík kynskráning notuð til að meina börnum aðgang að opinberri þjónustu. Helgi Hrafn Gunnarsson oddviti Pírata í Reykjavík spurði hvernig væri best að hafa þetta:
Ég skildi þetta alltaf þannig að „þriðja kynið“ væri í gæsalöppum einmitt vegna þess að það ætti bara að vera eitthvað í líkingu við „gef ekki upp“ eða „á ekki við“ eða eitthvað í þeim dúr.
Ugla Stefanía Kristjönudóttir Jónsdóttir, sem hefur verið áberandi í baráttu hinsegin fólks, segir best að tala um kynhlutlausa skráningu:
Það forðar okkur frá því að nota úrelt orðalag eða sérstaklega tileinka ákveðnum hóp skráninguna. Ég myndi því frekar orða þetta á þá leið að Píratar vilji lögleiða kynhlutlausa skráningu á vegabréfum, skilríkjum og opinberum skrám.