Steingrímur J. Sigfússon oddviti Vinstrihreyfingarinnar græns framboðs baðst afsökunar á að hafa kallað Sjálfstæðisflokkinn fatlaðan. DV greindi frá því í gærkvöldi að Steingrímur hefði látið umdeild ummæli falla á pallborðsfundi með nemendum Menntaskólans á Akureyri.
Steingrímur var spurður hvort Vinstri græn myndu mynda ríkisstjórn með Sjálfstæðisflokknum eftir kosningar, sagði hann þá orðrétt:
„Við viljum mynda vinstristjórn, félagshyggjustjórn, sem fer af stað með sterka uppbyggingaráætlanir fyrir landið og velferðarkerfið og ég sé ekki að það verði auðvelt að koma því af stað með Sjálfstæðisflokknum, sem er eins og kunnugt er fatlaður og getur ekki aflað tekna.“
Áslaug Arna Sigurbjörnsdóttir varaformaður Sjálfstæðisflokksins var ósátt við þetta. Áslaug, sem á systir sem hefur tekist á við erfið veikindi lét í sér heyra:
„Ég ætla að frábiðja mér því að pólitíkusar tali með þeim hætti að líkja einhverjum sem þeim líkar ekki við fatlaða einstaklinga. Það er fáránlegt. Við tölum ekki um að flokkar séu fatlaðir,“
Uppskar Áslaug Arna hávært klapp úr salnum. Steingrímur baðst svo afsökunar á ummælum sínum á fundinum og hefur síðan þá ítrekað afsökunarbeiðni sína, segir Steingrímur að honum hafi orðið á:
„Það er að sjálfsögðu óviðeigandi og óásættanlegt orðaval af minni hálfu.“