Eyjan

Fylgi Sjálfstæðisflokksins dalar – Stuðningur við ríkisstjórnina minnkar um 7 prósentustig

Ari Brynjólfsson
Miðvikudaginn 23. ágúst 2017 11:21

Mynd: DV/Sigtryggur Ari

Fylgi Sjálfstæðisflokksins hefur dalað um tæp 5 prósentustiga fylgi frá síðustu mælingu MMR sem lauk þann 21. júlí síðastliðinn en flokkurinn mælist þó enn með mest fylgi allra íslenskra flokka, eða 24,5%.

Flokkur Vinstri grænna fylgdi þar á eftir með 20,5% fylgi og Píratar mældust með 13,5% fylgi. Stuðningur við ríkisstjórnina lækkaði milli mælinga. Stuðningur við ríkisstjórnina minnkar um tæplega 7 prósentustig milli kannanna, kváðust 27,2% styðja ríkisstjórnina samanborið við 34,1% í síðustu könnun MMR.

Fylgi Samfylkingarinnar stendur í stað milli kannanna og mælist nú 10,6%. Framsóknarflokkurinn bætir eilítið við sig fylgi, mælist fylgið nú 10,1% og mældist 9,6% í síðustu könnun. Fylgi Flokks fólksins mælist nú 6,7% og mældist 6,1% í síðustu könnun.

Fylgi Viðreisnar mælist nú 6,0% og mældist 4,7% í síðustu könnun, sem þýðir að flokkurinn myndi ná manni inn á þing. Björt framtíð myndi ekki ná manni inn á þing líkt og í könnunum að undanförnu, en fylgi við flokkinn eykst lítillega, mælist Björt framtíð nú með 3,6% en mældist 2,4% í síðustu könnun. Íslenska þjóðfylkingin fengi 1,6% fylgi og Dögun 1,4% fylgi, aðrir flokkar fengju 1,6% samanlagt.

Könnunin var gerð dagana 15. til 18. ágúst 2017, spurðir voru 955 einstaklingar, 18 ára og eldri.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af