Stjórnvöld í Seoul hafa sent erindi til nágranna sinna í Pyongyang þar sem þeim er boðið til viðræðna um hernaðar- og mannúðarmál á landamærum landanna til að létta á spennunni sem verið hefur milli landanna og koma aftur á sameiningum fjölskyldna sem skildar voru í sundur í kjölfar Kóreustríðsins. Norður-Kóreumenn hafa ekki svarað þessu tilboðið nágranna sinna í suðri.
Viðbrögð Norður-Kóreumanna verða fyrsti mælikvarðinn á stefnumörkun nýs forseta Suður-Kóreu, Moon Jae-in, í málefnum hinna erfiðu nágranna í norðri. Hinn nýi forseti vill slaka á spennunni og koma á viðræðum í stað vopnaskaks og hótanna. Moon Jae-in heldur því fram að viðræður séu eina lausnin á krísunni sem kjarnavopnatilraunir Norður-Kóreumanna hafa leitt af sér.
Suður-Kóreumenn vilja senda sendinefnd frá hernum til landamæraþorpsins Panmunjom næstkomandi föstudag til að reyna að koma í veg fyrir aðgerðir sem aukið geta á spennu á landamærunum. Frá þessu greindi aðstoðarvarnarmálaráðherra Suður-Kóreu, Suh Choo-Suk fyrr í dag. Slíkur fundur væri fyrsti fundur milli stjórnvalda í Pyongyang og Seoul síðan 2015 og fyrsti fundur forsvarsmanna herja landanna frá 2014.
Leiðtogi Norður-Kóreu, Kim Jong-un, stakk upp á slíkum viðræðum í ræðu í maí í fyrra en þáverandi forseti Suður-Kóreu, Park Geun-hye, hafnaði tilboðinu og sagði það lagt fram af óheillindum, Norður-Kóreumenn þyrftu fyrst að hætta kjarnavopnatilraunum sínum.
Í kjölfar fyrstu tilrauna Norður-Kóreumanna með langdrægt flugskeyti sem drifið getur milli heimsálfa flutti Moon ræðu í Berlín þar sem hann undirstrikaði vilja stjórnar sinnar til samskipta við nágrannanna í norðri.