Um helgina hófst nýr kafli í sögu Reykjavíkurborgar þar sem mismunun var lögfest og allt gert til að gera erlendum gestum borgarinnar erfitt fyrir. Orðspor Reykjavíkurborgar mun skaðast þegar ferðamaðurinn þarf að klöngrast frá t.d. á sunnudagsnóttum til og frá Aðalstræti í gengnum skemmtanalíf miðborgarinnar með töskur sínar út að Tollhúsinu eða Ráðhúsinu til að komast i eða úr millilandaflugi.
Þetta segir Þórir Garðarsson stjórnarformaður Grayline og varaformaður Samtaka ferðaþjónustunnar. Tilefnið er bann Reykjavíkurborgar við akstri hópferðabifreiða í miðborginni sem tók gildi um helgina. Nýtt kerfi svonefndra safnstæða fyrir hópferðabifreiðar hefur verið tekið upp og nýjar merkingar settar upp.
Bannsvæðið markast af Fríkirkjuvegi, Sóleyjargötu, Njarðargötu, Eiríksgötu, Barónsstíg, Hverfisgötu, Tryggvagötu, Geirsgötu, Ægisgötu, Túngötu, Suðurgötu og Vonarstræti. Hægt er að aka um Lækjargötu.
Safnstöðvarnar eru tólf talsins og eru flestar við ytri mörk bannsvæðisins, við Hallgrímskirkju, Tjörnina, Ráðhúsið, Safnahúsið og Hörpu. Hægt er að sækja ferðamenn og skila þeim á stöðvarnar.
„Ábyrgð borgaryfirvalda er mikil, orðspor og gestrisni borgarinnar er ein verðmætasta eign hverra borgar en meirihluta borgarstjórnar er alveg sama, þetta „rútufargan“ eins og einn forvígismaður borgarstjórnar orðaði svo huggulega skal víkja úr borginni með góðu eða illu. Góð þjónusta á sanngjörnu verði verður bönnuð í miðborg Reykjavíkur,“ segir Þórir.