„Það er okkar sameiginlega verkefni að reka öflugt heilbrigðiskerfi þar sem sjúklingar þurfa ekki að bæta fjárhagsáhyggjum ofan á veikindi vegna of hárrar greiðsluþátttöku. Við þurfum ekki tvöfalt heilbrigðiskerfi. Fólkið í landinu vill ekki slíkt kerfi, ítrekað hefur það komið fram í skoðanakönnunum að yfirgnæfandi meirihluti landsmanna vill félagslega rekið heilbrigðiskerfi sem er vel fjármagnað.“
Þetta sagði Katrín Jakobsdóttir formaður Vinstri grænna í Eldhúsdagsumræðum á Alþingi í kvöld. Katrín var harðorð í garð ráðherra, þá sérstaklega í garð Benedikts Jóhannessonar fjármálaráðherra fyrir svikin loforð og niðurskurð í fjármálaáætlun ríkisstjórnarinnar. Sagði hún ríkisstjórnina verklitla og minnti helst á eftirpartý án húsráðanda, og vísaði þar til Bjarna Benediktssonar forsætisráðherra er er erlendis. Kallaði Katrín eftir hugarfarsbreytingu þegar kæmi að reksturs samfélags:
„Samfélag er ekki aðeins bókhald sem þarf að stemma af. Samfélag er undirstaða þeirrar velferðar sem við viljum búa fólkinu okkar. Það er sáttmáli grundvallaður á réttlæti og sanngirni þannig að þeir sem mest hafa leggi hlutfallslega meira af mörkum en þeir sem hafa minna á milli handanna.“
Erfitt fyrir Alþingi að vinna traust þegar þingmenn tala út og suður
Jón Gunnarsson samgönguráðherra talaði fyrstur fyrir hönd Sjálfstæðisflokksins, sagði hann þjóðina vænta miklar hagsældar eftir uppbyggingarstarf síðustu ára. Búast mætti við 20 milljarða árlegri útgjaldaaukningu en ljóst væri að þjóðin ætti langt á land á ýmsum sviðum. Jón vísaði til komu Costco og H&M í ræðu sinni og sagði þetta umbyltingu í verslun hér á landi:
Jafnvel að þótt heyrist gagnrýnisraddir frá vinstri, þá er það engum vafa undirorpið að aukin samkeppni á smásölumarkaði ætti að verða íslenskum neytendum veruleg kjarabót. Og því ber að fagna – og undrast um leið þau forpokuðu sjónarmið sem frá gagnrýnendum koma. Það er engin tilviljun að þessi fyrirtæki horfa nú til Íslands og ákveða að hefja hér starfsemi. Hér hefur niðurfelling tolla og vörugjalda sem síðasta ríkisstjórn stóð fyrir – og var reyndar gagnrýnd hér á Alþingi af vinstri mönnum – haft úrslitaáhrif,
sagði Jón. Varðandi heilbrigðiskerfið sagði Jón óþarfi að tala allt niður í svaðið, ný skýrsla sýndi fram á að Ísland stæði framarlega í erlendum samanburði, erfitt væri fyrir Alþingi að vinna traust þegar þingmenn töluðu út og suður:
Annað dæmi um furðulega skammsýni og pólitískt trúarofstæki er andúð vinstri manna á einkarekstri á ýmsum sviðum þar sem ríkið hefur verið ráðandi. Þetta á til að mynda við um ýmsa starfsemi á heilbrigðissviði. Hvaða vit er til dæmis í því að senda fólk til útlanda í liðsskiptaaðgerðir – á einkasjúkrahúsum svo því sé haldið til haga – með ærnum tilkostnaði fyrir samfélagið, þegar hægt er að gera þessar aðgerðir ódýrari hér á Íslandi?
Það er með ólíkindum að málum skuli vera svona fyrirkomið.