MMR birti í dag niðurstöður könnunar um afstöðu fólks til innheimtu veggjalda til að standa undir kostnaði við rekstur vega hér á landi. Í heildina eru tæp 56% andvíg veggjöldum en rúm 25% fylgjandi innheimtu slíkra gjalda.
Könnunin var framkvæmd dagana 11.-26. apríl og tóku 926 einstaklingar, 18 ára og eldri þátt í henni.
Rúm 39% þátttakenda í könnuninni voru mjög andvíg innheimtu veggjalda. Aðeins tæp 7% kváðust mjög fylgjandi innheimtu veggjalda. Á heildina sögðust tæp 56% andvíg svarenda veggjöldum en rúm 25% fylgjandi.
Karlar eru líklegri til að vera á móti innheimtu veggjalda en konur en 60% kváðust vera það en aðeins helmingur kvenna. Lítill munur var hins vegar eftir kyni meðal þeirra sem fylgjandi eru innheimtu slíkra gjalda, 25% karla og 26% kvenna.
Af þátttakendum á aldrinum 18-29 ára kváðust 32% vera hvorki andvíg né fylgjandi veggjöldum. Því eldra sem fólk er því jákvæðari er það til innheimtu slíkra gjalda en 29% þátttakenda 68 ára og eldri sögðust fylgjandi.
Landsbyggðarfólk er upp til hópa andsnúnara veggjöldum en þeir sem búa á höfuðborgarsvæðinu. 63% þeirra sem búa úti á landi eru andvígir en 52% þeirra sem búa á höfuðborgarsvæðinu.
Stuðningsfólk Pírata (57%) og Samfylkingarinnar (50%) reyndust töluvert líklegri en stuðningsflokk annarra flokka til að vera mjög andvíg innheimtu veggjalda. Stuðningsfólk Viðreisnar reyndist aftur á móti mun líklegra en stuðningsfólk annarra flokka til að vera frekar eða mjög hlynnt veggjöldum eða 45%.