RecepTayyip Erdogan forseti Tyrklands segir að fólk af tyrkneskum uppruna búsett í Evrópu eigi nú að einbeita sér að því að hver fjölskylda þeirra ali fimm börn í stað þriggja. Þannig vill hann að Tyrkir fjölgi sér í álfunni.
Tyrklandsforseti hélt ræðu á kosningafundi sem haldinn var í Eskisehir í norðvesturhluta Tyrklands í dag, föstudag.
Þar fullyrti Erdogan að Evrópubúar væru fordómafullir gagnvart Tyrkjum sem stundi sjálfstæðan atvinnurekstur í álfunni. Á sama tíma hafi þeir „ekkert á móti Tyrkjum sem vinni í verksmiðjunum.“
Ekki eignast þrjú, heldur fimm börn! Þið eruð framtíð Evrópu…Ég hvet mína borgara og bræður í Evrópu: á þeim stað þar sem þið starfið og búið nú er ykkar nýja heimaland. Takið þátt! Stofnið fleiri fyrirtæki! Sendið börn ykkar í betri skóla! Akið bestu bílunum og búið í fínustu húsunum,
sagði Erdogan að sögn norsku fréttastofunnar NTB.
Svo er að sjá sem Erdogan rói nú öllum árum að því að kynda undir þjóðernisofstopa meðal Tyrkja sem búsettir eru í Tyrklandi og utan þess, svo sem í löndum Vestur-Evrópu. Þar eru Vesturlönd gerð að óvininum. Með þessu vill hann afla stuðnings meðal tyrkneskra kjósenda í þjóðaratkvæðagreiðslu sem fer fram í Tyrklandi eftir mánuð. Þar munu Tyrkir ákveða hvort breyta eigi stjórnarskrá lands þeirra þannig að Erdogan forseta verið færðar enn meiri valdheimildir.
Erdogan hefur reynt að færa kosningabaráttuna inn í lönd Vestur-Evrópu með því að láta ráðherra sína og aðra háttsetta trúnaðarmenn efna þar til kosningafunda meðal Tyrkja sem þar búa. Tyrkneskum stjórnvöldum lenti þannig harkalega saman við hollensk stjórnvöld rétt fyrir þingkosningarnar í Hollandi fyrr í vikunni þegar tveimur ráðherrum á vegum Erdogan var meinað að halda kosningafundi þar í landi.
Tyrkjum virðist hvergi runnin reiðin. Á fimmtudag hélt Mevlut Cavusoglu utanríkisráðherra Tyrklands kosningaræðu í Antalya í Suður-Tyrklandi. Þar kom hann inn á úrslit hollensku þingkosninganna:
Það er enginn munur á hugarfari Geert Wilders og sósíaldemókrata í Hollandi. Þeir eru sama sinnis…Það hugarfar mun færa Evrópu fram af hengifluginu. Brátt munu trúarbragðastríð geta brotist út í Evrópu og það mun gerast,
sagði tyrkneski utanríkisráðherrann.