Sigmundur Davíð Gunnlaugsson þingmaður Framsóknarflokksins og fyrrverandi forsætisráðherra segir áætlun vogunarsjóðanna um að fá nýja ríkisstjórn og betra verð hafa gengið upp. Sigmundur segir löngu tímabært að aflétta höftum af almenningi og lækka svo vexti. Segir hann að aðgerðirnar í dag sanna endanlega að aðgerðir hans ríkisstjórnar á síðasta kjörtímabili til að endurreisa efnahagslíf landsins og aflétta höftum hafi heppnast fullkomlega:

En í stað þess að klára planið eins og lagt var upp með og gera þetta að sigurdegi virðist stjórnvöld ætla að nota tækifærið til að leysa vogunarsjóðina út með gjöfum, alla á einu bretti.

Óttinn reyndist réttur. Það stendur til að verðlauna hrægammana sem vildu ekki spila með (í útboðinu í fyrra) og ákváðu þess í stað að beita áróðri og undirróðri til að hafa áhrif á íslensk stjórnmál,

segir Sigmundur. Stjórnvöld á þeim tíma hafi verið búin að gera mönnum ljóst að þeir sem tækju ekki þátt sætu eftir og gætu setið fastir á lágum eða engum vöxtum í mörg ár. Fyrir vikið voru þeir sem trúðu því að stjórnvöldum væri alvara reiðubúnir til að borga 190 krónur fyrir hverja evru þegar skráð gengi var um 139 krónur. Í dag var svo greint frá því að kröfuhafar fá að kaupa evruna á 137,5 krónar:

Sá sem hefði fengið 100 milljón evrur með því að taka þátt í útboðinu fær nú rúmlega 138 milljón evrur. Það er hægt að kaupa margar auglýsingar og ráða marga PR-menn fyrir slíkan mun.

Planið gekk upp hjá vogunarsjóðunum. Þeir fengu kosningar, nýja ríkisstjórn, nýja stefnu og nýtt verð. „Special price for you my friend“.