Lilja Alfreðsdóttir varaformaður Framsóknarflokksins vill kalla Þorgerði Katrínu Gunnarsdóttur sjávarútvegs- og landbúnaðarráðherra fyrir efnahags- og viðskiptanefnd Alþingis og að hún geri grein fyrir þjóðhagslegum kostnaði af verkfalli sjómanna og hvaða almennu aðgerðir hún hugi að. Lilja sagði í Bítinu á Bylgjunni í morgun að það líti út fyrir að það hafi skort undirbúning af hálfu stjórnvalda:

Nú hefur sjómannaverkfallið staðið yfir í rúmar átta vikur og ég kom með fyrirspurn inn á þing nú 31. janúar þar sem ég beindi fyrirspurn til sjávarútvegs- og landbúnaðarráðherra þar sem ég spurði hvort búið væri að meta hin þjóðhagslegu áhrif af verkfallinu, og það var ekki búið að gera það 31. janúar en í kjölfarið fer ráðuneytið í það að meta og birti skýrslu þess efnis núna á föstudaginn. Ég auðvitað fagna því en ég hefði talið að þetta hafi þurft að vera algjört forgangsmál hjá nýjum ráðherra að fara í það að meta áhrifin og hvernig ætti hugsanlega að koma inn í deiluna ef á þyrfti að halda vegna þess að þetta er algjör grunnatvinnuvegur þjóðarinnar,

sagði Lilja. Það sé alltaf matsatriði hvenær stjórnvöld eigi að grípa inn í kjaradeilu af þessu tagi, meta þarf hversu mikið þjóðarbúið þarf að tapa og hversu marga erlenda markaði lokað er á:

Ég spurði hana líka 31. janúar hvort það stæði til að liðka fyrir, þá er ég ekki að tala um sértækar aðgerðir eða setja á lög, heldur bara hvernig ætla stjórnvöld að koma að málinu vegna þess að það er þannig að þú þarft að vera tilbúinn vegna þess að þú getur ekki notað næstu vikuna í að huga hvernig þú ætlar að koma að málinu því þá ertu að hrekjast í málinu. Það er það sem búið að gerast.