„Á þingflokksfundi í gærkvöldi sagðist ég því miður ekki geta stutt þá ráðherraskipan sem formaður flokksins gerði tillögu um,“ skrifaði Páll Magnússon þingmaður Sjálfstæðisflokksins á fésbókasíðu sína klukkan tíu í morgun. Ríkisstjórnin er aðeins með eins manns meirihluta á þingi og því má segja að þessi yfirlýsing Páls hafi komið á óvart enda um það talað af sérfræðingum að stjórnarmeirihlutinn yrði að standa þétt saman til að verjast falli. En Birgitta Jónsdóttir, þingmaður Pírata, boðaði vantraust á ríkisstjórnina áður en hún var mynduð.

Páll gaf upp tvær ástæður fyrir afstöðu sinni. „Í fyrsta lagi gengi þessi skipan í veigamiklum atriðum gegn því lýðræðislega umboði sem þingmenn Sjálfstæðisflokksins hefðu áunnið sér í prófkjörum og síðan kosningum í haust. Í öðru lagi fæli hún í sér lítilsvirðingu gagnvart Suðurkjördæmi þar sem Sjálfstæðisflokkurinn vann sinn stærsta sigur í kosningunum.“

Færslan er svona í heild sinni:

Vegna fjölda fyrirspurna og athugasemda sem hafa dunið á mér síðasta hálfa sólarhringinn finnst mér skylda mín að upplýsa stuðningsmenn Sjálfstæðisflokksins í Suðurkjördæmi um eftirfarandi: Á þingflokksfundi í gærkvöldi sagðist ég því miður ekki geta stutt þá ráðherraskipan sem formaður flokksins gerði tillögu um. Fyrir því væru tvær ástæður: Í fyrsta lagi gengi þessi skipan í veigamiklum atriðum gegn því lýðræðislega umboði sem þingmenn Sjálfstæðisflokksins hefðu áunnið sér í prófkjörum og síðan kosningum í haust. Í öðru lagi fæli hún í sér lítilsvirðingu gagnvart Suðurkjördæmi þar sem Sjálfstæðisflokkurinn vann sinn stærsta sigur í kosningunum.
Því má bæta við að þetta hefur auðvitað ekkert með þá einstaklinga að gera sem völdust til ráðherraembætta. Þau eru öll hið vænsta fólk og ég óskaði þeim hjartanlega til hamingju.

Börkur Gunnarsson